Қазақстанда 2021 жылдан бастап кәсіпкерлік қызмет саласында жаңа реттеушілік саясат кезең-кезеңімен жүзеге асырылып келеді, деп хабарлайды 7-su.kz ақпараттық порталы turkystan.kz сайтына сілтеме жасап.
2024 жылғы 6 сәуірде мемлекеттік қадағалауды жетілдірген және 10 мыңнан астам артық талаптардың күшін жойған «Бизнесті жүргізу туралы» заң қабылданды. Бас прокуратураның мәліметінше, 2024 жылы бизнеске қадағалау жүктемесі 2019 жылмен салыстырғанда 58 пайызға азайған.
Сондай-ақ 2024 жылғы 30 желтоқсанда қабылданған «Биржалық сауда және кәсіпкерлік мәселелері жөніндегі» заң аясында «прокурорлық сүзгі» тетігі енгізілді. Бұл инвесторларға қадағалау жүктемесін азайту мақсатында кез келген шектеу мен тыйым салу шараларын прокурорлардың мақұлдауын міндеттейді.
2025 жылдың соңына дейін лицензиялау рәсімдері жеңілдетіліп, мерзімдері қысқартылады. Бизнеске арналған есеп беру міндеттемелері қысқартылып, кәсіпкерлік қызметтің 58 саласындағы 381 ақпараттық құрал 49 пайызға оңтайландырылды және 37 пайызы автоматтандырылды.
Бұл шаралардың нәтижесінде шағын және орта бизнес саны 2024 жылмен салыстырғанда 4,7 пайызға (96 209 кәсіпорынға) өсіп, 2 125 003 кәсіпорынды құрады. Экономикадағы ШОБ үлесі 0,9 пайыздық тармаққа артып, 38,6 пайызға жетті. ШОБ субъектілерінің өнім шығару көлемі 18,7 трлн теңгені құрап, 11,4 пайызға көбейді.
Президенттің тапсырмасына сәйкес, мемлекеттің бизнеспен өзара іс-қимылы қадағалаудан серіктестікке қарай өзгеруде. Осы мақсатта 2025 жылғы 1 сәуірде кәсіпкерлерге арналған заманауи цифрлық көмекші – eGov Business мобильді қосымшасы жаңартылды.
Қосымша арқылы кәсіпорынды онлайн тіркеу, салық күнтізбесін қадағалау, электронды сертификаттар алу және құжаттарға цифрлық қол қою сияқты сервистер қолжетімді болды.
