Премьер-министрдің бірінші орынбасары Роман Склярдың төрағалығымен жанар-жағармай нарығындағы жағдайға қатысты кеңес өтті. Оған Энергетика, Қаржы, Ішкі істер министрліктерінің өкілдері, Қаржы мониторингі агенттігі және ҰҚК Шекара қызметі қатысты.
Кеңесте ішкі нарықты тұрақты отынмен қамтамасыз ету және шекара маңындағы өңірлерде мұнай өнімдерінің заңсыз айналымына жол бермеу мәселелері қаралды. Энергетика министрлігінің дерегінше, қазіргі таңда елде қажетті отын қоры жеткілікті, нарықтағы ахуал тұрақты.
Жиын қорытындысында Роман Скляр жауапты органдарға мұнай өнімдерінің заңсыз сыртқа шығуына тосқауыл қою үшін егжей-тегжейлі жоспар әзірлеуді тапсырды.
«Бағадағы алшақтық пен логистикалық қиындықтар тапшылыққа әкеп соқпауы керек. Бұл мәселе Үкіметтің тұрақты бақылауында», – деді ол.
