Талдықорған қаласында қай мезгіл болмасын жол мәселесі өте өзекті. Әдеттегідей, жыл сайын көше бойында қазылған ор, аршылған асфальт, тозған жылу желілерін ауыстыру көрінісі қайталанады. Қала тұрғындары мұндай көрініске үйреніп те қалғандай.
Биыл да жағдай басқаша болған жоқ. Әуелі Рүстембеков көшесі толық қырып, жаңадан асфальт төселді. Бұрын көлікпен жүрудің өзі мұңға айналған бұл көше бүгінде тегіс әрі көрікті кейіпке енген. Артынша Гагарин көшесінде де үлкен жөндеу жұмыстары қолға алынып, Шоқан Уәлиханов көшесінің қиылысынан бастап Назарбаев даңғылына дейін жаңа жабын төселді. Күн сайын көлік жүргізетін қала тұрғындары бұл өзгеріске дән риза еді.
Алайда қуаныш ұзаққа созылмады. Күні кеше ғана Гагарин көшесінің Қабыл Иса жырау көшесімен қиылысар тұсы тағы да қазылды. Әлі иісі кете қоймаған жаңа асфальттың ортасында қайтадан техника тұр. Бұл жолы тағы да жылу желілерін ауыстыру жұмыстары жүргізіліп жатқан көрінеді. Бірақ тұрғындардың көңілі күпті: «Жол қырып жатқанда неге алдын ала есептемейді? Неліктен түрлі қызметтер өзара келісіп алмайды?» деген сұрақ жиі қойылуда. Тіпті, «Шыңғыс ханның алтынын іздеп жатыр» деген де сөздер айтылуда.
Қазір қазылған жердің тағдыры белгілі – біраз уақыттан соң үстінен жамау салынады. Нәтижесінде жаңа жолдың сәні мен сапасы бұзылады. Мұндай көрініс Талдықорған үшін, өкінішке қарай, жыл сайынғы қалыпты жағдайға айналған.
Қала тұрғындары мен жүргізушілер жергілікті биліктен бір ғана нәрсе күтеді – жұмысты жүйелі жүргізу. Яғни жол жөндеу мен инженерлік инфрақұрылымды жаңарту қатар жоспарланып, бір ретте, сапалы жасалса деген үміт бар. Әйтпесе, жаңа асфальттың ғұмыры жыл сайын қысқарып, шаһардың жолдары «жамау-жамау» күйінде қала бермек.
Мәулен Әнербай
