Жетісу облысының полиция департаменті облыс әкімдігінің қолдауымен мобильді құрылғыларға арналған «Megacam.Bodycam» инновациялық қосымшасын енгізіп жатыр.
Бұл цифрлық жоба – мемлекеттік цифрландыру саясатын жүзеге асыру және құқық қорғау органдарының қызмет тиімділігін арттыру бағытындағы маңызды қадам.
Ашықтық пен тиімділік
«Megacam.Bodycam» платформасы полиция қызметкерлерінің жұмыс үдерісін автоматтандыруға арналған. Жүйе оқиғаларды онлайн тіркеуге, деректерді бір уақытта жіберуге және құқық бұзушылықтардың алдын алуға мүмкіндік береді. Сонымен қатар, даулы жағдайларда дәлелдемелік базаны қалыптастыруда үлкен рөл атқарады.
Бағдарламаның басты артықшылықтарының бірі – онлайн-мониторинг функциясы. Бұл мүмкіндік арқылы басшылық қызметкерлердің қозғалысын, орналасқан жерін және қызмет сапасын нақты уақыт режимінде бақылай алады. Мұндай бақылау қызметтік тәртіпті күшейтіп, өкілеттіктерді асыра пайдалану жағдайларын азайтуға жол ашады.
Сенімділікті арттыру
Қосымшаның тағы бір маңызды мақсаты – полиция мен азаматтар арасындағы сенімді нығайту. Әрбір оқиға цифрлық түрде тіркеліп, дәлел ретінде сақталады. Осылайша, жаңа технологиялар қоғамның қауіпсіздігін қамтамасыз ету мен азаматтардың құқықтарын қорғау ісінде сенімді құралға айналуда.
Жетісу облысының полиция департаменті бұдан әрі де өңір тұрғындарының қауіпсіздігі мен сенімін арттыру бағытында инновациялық шешімдерді кезең-кезеңімен енгізуді жалғастырмақ.
