23 тамыз – ел өміріндегі мәні зор күндердің бірі. Құрылтай – халқымыздың басын біріктіріп, елдің бүгіні мен болашағын талқылайтын, ортақ ой мен маңызды мәселелер тоғысатын үлкен алаң деп түсінемін.
Менің ойымша, кез келген елдің мықтылығы – оның бірлігінде. Бірлік бар жерде береке, татулық бар жерде тұрақтылық болады. Сондықтан Құрылтайдың негізгі мәні де – халықтың үнін есту, елдің өзекті мәселелеріне назар аудару және болашаққа бірге қадам жасау.
Елімізде жастарға, білімге, еңбекке, отбасына және ұлттық құндылықтарға ерекше көңіл бөлінетіні қуантады. Дегенмен, мемлекет қана емес, әр азамат өз ісіне жауапкершілікпен қарап, қоғамның дамуына аз да болса үлесін қосса, еліміздің болашағы жарқын болады деп сенемін. Абай Құнанбайұлы айтқандай «Сен де бір кірпіш дүниеге…». Түрі, тілі, діні ұқсас болғанымен әрбір адамның қаланатын өз кетігі болады.
Осы тұрғыдан алғанда, Құрылтай маған ең алдымен «ел үшін мен не істей аламын?» деген ой салады. Себебі елдің дамуын тек мемлекеттен немесе бір адамнан күту дұрыс емес. Өз отбасымызға, айналамызға, туған жерімізге деген жауапкершіліктен үлкен өзгерістер басталады.
Біз ата-бабамыздан аманат болып жеткен жерімізді, тілімізді, дәстүрімізді, ұлттық құндылықтарымызды құрметтеп, оны кейінгі ұрпаққа жеткізуіміз керек. Сонымен қатар заман талабына сай білім алып, еңбек етіп, жаңа мүмкіндіктерге ұмтылуымыз қажет.
Мен еліміздің болашағына сенемін. Себебі біздің халқымыздың ең үлкен күші – қиындыққа мойымайтын төзімі, еңбекқорлығы және бірлігі.
Құрылтай елдің әр азаматына ой салып, ортақ мақсатқа жұмылдыратын маңызды басқосу болсын. Әрқайсымыз еліміздің дамуына өз үлесімізді қосып, кейінгі ұрпаққа жарқын әрі берекелі Қазақстан қалдыруға атсалысайық.
Бекзат ОРАЗОВА
«Б. Жолбарысұлы атындағы №18 орта мектеп-лицейі» КММ
Химия пәнінің мұғалімі
