Алакөл ауданында тәрбие және психологиялық қолдау бағытындағы өзекті мәселелер талқыланған семинар-кеңес өтті. Алакөл аудандық әкімдігінің ұйымдастыруымен, аудан әкімінің орынбасары Мәулен Төлеубекұлының төрағалығымен ашылған семинарға мектеп және колледж директорлары, тәрбие ісі жөніндегі мамандар, психологтар, менторлар, сондай-ақ, аудандық прокуратура мен полиция өкілдері қатысты.
Кеңесте «Адал азамат» біртұтас тәрбиелік бағдарламасының білім ұйымдарында жүзеге асырылу барысы таныстырылып, оның негізгі бағыттары мен тиімді тетіктері жан-жақты талқыланды. Сонымен қатар оқушылардың эмоциялық жай-күйін бақылауға бағытталған «Жан дауысы» жобасы ұсынылып, оның анонимді чат-бот, «ата-анаға жылы сөз» хаты, эмоциялық тақта секілді құралдары таныстырылды.
Құқық қорғау органдарының өкілдері балалардың қауіпсіздігін қамтамасыз ету, құқықбұзушылық пен буллингтің алдын алу мәселелеріне тоқталып, заңнамалық талаптарды түсіндіру және профилактикалық жұмысты күшейту жөнінде ұсыныстар айтты.
Кездесу барысында білім беру ұйымдарындағы тәрбие жұмысының сапасын арттыру, ата-ана мен мектеп арасындағы байланысты нығайту, оқушыларға қауіпсіз әрі қолайлы орта қалыптастырудың маңыздылығын ерекше атап өтті. Қатысушылар өзара тәжірибе алмасып, алдағы жұмыс жоспарларын нақтылап, жаңа жобаларды тиімді енгізу бойынша ортақ пайым жасады.
Рысалды ШАРАПИЕВА
Алакөл ауданы әкімінің баспасөз хатшысы
