Алакөл ауданында Халыққа қызмет көрсету орталықтарының құрылғанына 20 жыл толуына арналған мерейтойлық қабылдау өтті. Іс-шараға аудан әкімі Алмас АБДИНОВ төрағалық етіп, мемлекеттік қызмет сапасын арттыруға айрықша үлес қосқан мамандардың еңбегін жоғары бағалады.
Жиын шымылдығы құттықтау лебізімен ашқан аудан басшысы қоғам мен мемлекет арасын жалғайтын сала қызметкерлерінің рөліне ерекше тоқталып:
– Күн сайын тұрғындармен жүзбе-жүз жұмыс істейтін мамандардың кәсіби білігі мен әділдігі – халық сенімін қалыптастыратын басты өлшем. Мемлекеттік қызметтің беделін көтеру жолында атқарып жүрген еңбектеріңіз ерен. Баршаңызды мерейтойларыңызбен шын жүректен құттықтап, отбасыларыңызға амандық, жұмыстарыңызға береке тілеймін, – деді.
Марапаттау рәсімінде бірқатар қызметкерлерге «Құрмет» грамотасы және «Алғыс» хат табысталып, олардың сала дамуына қосқан үлесі ерекше аталды. Солардың қатарында Алакөл аудандық ХҚКО бөлімінің басшысы Эльмира Дурманова да бар. «Құрмет» грамотасын иеленген ол ризашылық білдірді.
– Бұл сыйлық – жеке еңбегімнен бұрын, барша ұжымның тиянақты жұмысының нәтижесі. Халыққа қызмет көрсету – үлкен жауапкершілікті талап ететін іс. Күн сайын түрлі сұрақпен келген тұрғындардың мәселесін дер кезінде шешуге тырысамыз. Бізге артылған сенім үшін аудан әкімдігіне және әріптестеріме алғыс айтамын. Алдағы уақытта да ашықтық пен жеделдік қағидаттарын басшылыққа алып, қызмет сапасын жоғарылата береміз, – деді.
Салтанатты жиын соңында аудан басшылығы сала мемлекеттік қызметтің тиімділігін арттыру бағытындағы жұмыстар үздіксіз жалғасатынын жеткізді.
Рысалды ШАРАПИЕВА
Алакөл ауданы әкімінің баспасөз хатшысы
