Көксу ауданы Теректі ауылындағы «Уыз Май Industry» соя өңдеу зауыты Қазақстан мен ТМД нарығында аса танымалдылығымен белгілі кәсіпорын.
Өнім сапасын басты межеге қойған ұжым тұтынушылар талабын өтеу үшін өндіріс желісін толықтай жаңғыртып, батысеуропалық құрылғыларды енгізген. Заманауи қондырғылар соя бұршағын терең өңдеп, экологиялық талаптарға сай дайын өнім шығаруға мүмкіндік беруде.
Зауыт аумағында жарма сақтайтын үлкен қоймалары мен арнайы салқындатқыш орын бар. Мұндағы зертхана өндірілетін өнім сапасын жіті тексеріп, стандартқа сай дән ғана өңдеуге жіберіледі. Бұл – кәсіпорынның сенімділігін арттырып отырған негізгі тетік.
Кәсіпорының бас инженері Сергей Сокординнің айтуынша, жұмыс қағидасы жоғары сапалы шикізатты таңдап, заманауи технологияда өңдеп, серіктестерге таза әрі пайдалы өнім ұсыну. Бір маусымда 16,8 тонна соя өндіруге қауқарлы өндіріс орны тұрақтылық пен қаржылық тәртіптің арқасында нарықта өз орнын нық бекіткен.
Елде асыл тұқымды мал мен құс, балық шаруашылығы және мал азығы өндірісі қарқын алған шақта мұндағы өнімге деген сұраныс артып келеді. Жергілікті диқандар да еңбектерінің жерде қалмайтынына сенімді. Соя өсірген шаруалар үшін бұл зауыт – нақты тірек, тұрақты өткізу орталығы.
Қазір мұнда 150 адам еңбек етеді. Жалақысы дер кезінде берілетін жұмыс орны ауыл тұрғындары үшін үлкен қолдау. Өңірдің агроөнеркәсіп саласын алға сүйреп отырған «Уыз Май Industry» – бір ауылдың ғана емес, тұтас Көксу ауданындағы өндірістік дамудың белсенді күшіне айналған кәсіпорын.
Санжар СҰЛТАНҒАЗЫ
