Жетісу облысында полиция департаментінің кинологиялық қызмет орталығы күдіктілерді ұстау кезіндегі қауіпсіздік пен тиімділікті арттыруға бағытталған кезекті оқу-жаттығу өткізді, – деп хабарлайды Polisia.kz.
Жаттығудың негізгі бөлігі – құқық бұзушы көлік ішінде бұғатталған жағдайда қызметтік иттің әрекетін пысықтау. Сценарийлер шынайы жағдайға барынша жақындатылып жасалып, әрбір секунды есепке алынады. Көлікке бірінші болып қызметтік ит жіберіледі. Оның міндеті – қауіптің көзін дереу бейтараптандырып, құқық бұзушыға қарсылық көрсетуге жол бермеу. Бұл полиция қызметкерлеріне қауіпсіз әрі бақылаулы ұстау жүргізуге мүмкіндік береді.
Кинологтардың айтуынша, бұл – дайындықтың ең күрделі элементтерінің бірі. Ол жоғары деңгейдегі бағынуды, жинақылықты және ит пен жетекшінің үйлесімді жұмысын талап етеді. Жетекшінің кіру сәтін дұрыс таңдау, фигурантты бекіту, техникалық әрекеттерді нақты орындау – барлығы қатысушылардың қауіпсіздігін қамтамасыз етуге бағытталады.
Мамандар мұндай оқу-жаттығулар тұрақты түрде өткізіліп, қызметтік иттердің жылдам әрекет ету қабілетін, маневрлігін және тосын жағдайларда жұмыс істеу дағдыларын жетілдіретінін атап өтті. Тәжірибе көрсеткендей, дәл осындай дайындық нақты операциялар кезінде қызметкерлердің жарақат алу қаупін азайтып, құқық бұзушыларды қауіпсіз ұстауға көмектеседі.
