Талдықорғанда полицейлер жас сақшыларға жол ережелері бойынша сабақ өтті, – деп хабарлайды Polisia.kz.
Жетісу облысында балаларға жолдағы қауіпсіз мінез-құлықтың негіздерін үйрету жұмыстары жалғасуда.
Жетісу облыстық полиция департаментінің қоғамдық қауіпсіздік басқармасының қызметкерлері Талдықорғандағы №14 орта мектептің «Жас сақшы» сыныбына жол қозғалысы ережелеріне арналған танымдық сабақ өткізді.
Кездесу кезінде полицейлер кадеттерге жол қозғалысы ережелерінің негізгі талаптарын, жолда мұқият болудың маңызын, жаяу жүргінші, жолаушы және велосипедші ретінде дұрыс әрекет ету қағидаларын түсінікті әрі жан-жақты түсіндірді. Балаларға жарық шағылыстырғыш элементтерді қолдану, бағдаршам сигналдарын және жол белгілерінің талаптарын сақтау қажеттілігі еске салынды.
Сондай-ақ жол-көлік оқиғалары салдарынан балалардың жарақат алу себептері мен ережені бұзудың ауыр салдары нақты мысалдар арқылы айтылды. Кадеттер талқылауға белсенді қатысып, сұрақтар қойып, өз бақылауларымен бөлісті.
Мұндай сабақтар балалардың жеке қауіпсіздікке деген жауапкершілігін қалыптастырып, күнделікті өмірде қажет дағдыларды бекітуге ықпал етеді. Жетісу облысының полициясы кәмелетке толмағандар арасындағы жол-көлік оқиғаларының алдын алу және қауіпсіз мінез-құлық мәдениетін қалыптастыру бағытындағы жұмысын жалғастырып жатыр.
