Гендерлік зорлық-зомбылыққа қарсы «Өзіне оралу» атты 16 күндік республикалық ақпараттық науқан аясында 5514 әскери бөлімінде мазмұнды ашық есік күні ұйымдастырылды. Іс-шараның мақсаты – қоғамда зорлық-зомбылықсыз қарым-қатынас мәдениетін қалыптастыру, жасөспірімдерге әскери қызмет туралы түсінік беру және патриоттық тәрбиені күшейту болды.
Іс-шараға Талдықорған қаласындағы «Жанұя» отбасын қолдау орталығы мен «Айналайын» балаларды қолдау орталығының тәрбиеленушілері қатысты.
Келушілер үшін әскери бөлімнің қызметі жан-жақты таныстырылды:
- Қонақтарға әскери техника мен қару-жарақтың үлгілері көрсетіліп, олардың қолданылу тәртібі туралы түсіндірілді.
- Кинолог мамандары қызметтік иттермен із кесу, бұйрықтарды орындау және нысанды ұстау бойынша көрнекі көрсетілім жасады.
- Сарбаздардың күнделікті киім-кешегі, жабдықтары және жатын бөлмелері таныстырылды.
- Қатысушылар әскери бөлімнің асханасында сарбаздардың тамақтану тәртібімен танысып, ас әзірлеу процесін көрді.
- Бөлімдегі 3-дәрежелі «Айбын» орденінің иегері, батыр Аманов Айбат Ерболұлына арналған естелік бұрыш таныстырылып, оның ерлік жолына тоқталды.
Іс-шараның рухани мазмұнын арттыру мақсатында бөлім клубында «Айналайын» орталығының тәрбиеленушілері сарбаздарға патриоттық өлеңдерін орындады. Отанды сүюге, ерлікке үндейтін бұл өнерпаздық бағдарлама әскери қызметшілерге жылы әсер қалдырды.
Сонымен қатар, «Жанұя» орталығының психологы қатысушыларға зорлық-зомбылықтың алдын алу, қауіпсіз қарым-қатынас мәдениеті туралы қысқаша ақпарат беріп, осы бағыттағы бейнероликті көрсетті.
Ашық есік күні балалар үшін тәрбиелік мәні зор, қызықты әрі танымды шара болды. Мұндай кездесулер жасөспірімдердің патриоттық сана-сезімін қалыптастырып, әскерге деген құрметін арттыруға ықпал етеді.
