Премьер-Министр Олжас Бектенов Үкімет отырысында Көлік министрлігі мен «ҚазАвтоЖол» компаниясына мемлекеттік шекарадағы өткізу пункттерінің құрылысын жеделдетуді тапсырды, – деп хабарлайды 7-su.kz ақпараттық порталы.
Оның айтуынша, Президенттің тапсырмасына сәйкес, желтоқсан айында мемлекеттік шекара арқылы өткізу пункттерін жаңғырту жұмыстары толық аяқталуы тиіс.
«Мемлекет басшысының тапсырмасына сәйкес, желтоқсан айында мемлекеттік шекара арқылы өткізу пункттерін жаңғырту жұмыстары аяқталады. Жақын арада 5 өткізу пункті іске қосылады. Осылайша, Еуразиялық экономикалық одақтың сыртқы контурындағы барлық өткізу пункттері халықаралық стандарттарға сай болып, жүктердің жылдам өтуін қамтамасыз етеді», – деді Олжас Бектенов.
Премьер-Министр Көлік министрлігіне және «ҚазАвтоЖол» компаниясына құрылыс қарқынын арттырып, нысандарды белгіленген мерзімде іске қосуды тапсырды. Бұл мәселе Үкімет басшысының тікелей бақылауында.
