Жетісу облысында ауа райының күрт нашарлауына байланысты бірқатар автожолдарда қозғалыс қиындады. Боран, көктайғақ пен қатты жел салдарынан жолдың кей учаскелерінде қозғалыс уақытша шектелді, – деп хабарлайды Polisia.kz.
Облыстық патрульдік полиция батальонының қызметкерлері күшейтілген режимде жұмыс істеп, жүргізушілердің қауіпсіздігін қамтамасыз етуге кірісті. Алматы – Өскемен республикалық трассасының күрделі бөлігінде полицейлер 150 жүк көлігінен тұратын колоннаны қауіпсіз аймаққа дейін ілесіп жеткізді. Экипаждардың үйлесімді әрекеті нәтижесінде жүргізушілер жақын маңдағы кемпингтер мен демалыс орындарына орналастырылды.
Полиция бөлімінің мәліметінше, мұндай шаралар жол-көлік оқиғаларының алдын алуға едәуір ықпал етеді және қолайсыз ауа райында жүргізушілердің қауіпсіздігін арттырады. Құқық қорғау органдары тәулік бойы жол жағдайына мониторинг жүргізіп, күрделі учаскелерде көмек көрсетуде.
Полиция жүргізушілерге мына талаптарды сақтауды ескертеді:
• ауа райының қолайсыздығын ескеріп, рөлде барынша мұқият болу;
• ұзақ сапарларға уақытша шықпау;
• жол қызметтері мен полицейлердің нұсқауларын қатаң орындау.
