2026 жылы Қазақстанда ең төменгі зейнетақы мөлшері ұлғайып, бюджеттік жоспар бойынша өсім 6 278 теңгені құрайды, – деп хабарлайды 7-su.kz ақпараттық порталы Aikyn.kz сайтына сілтеме жасап.
2026-2028 жылдарға арналған республикалық бюджет жобасына сәйкес, елімізде зейнетақы төлемдерін кезең-кезеңімен индекстеу қарастырылған. Егер қазіргі уақытта ең төменгі зейнетақы мөлшері 62 771 теңге болса, 2026 жылы бұл көрсеткіш 69 049 теңгеге жетеді.
Сонымен қатар мемлекет тарапынан берілетін базалық зейнетақы төлемі де назардан тыс қалған жоқ. Оның көлемі 3 236 теңгеге артып, 35 596 теңгені құрайтын болады.
2026 жылға арналған болжамды есеп:
-
Ең төменгі жиынтық зейнетақы: 104 645 теңге;
-
Ең жоғары зейнетақы мөлшері: 238 412 теңге.
Айта кетерлігі, елімізде зейнетке шығу жасы 2028 жылға дейін өзгеріссіз қалады. Қазіргі заңнама бойынша ерлер 63 жаста, ал әйелдер 61 жаста құрметті демалысқа шығады. Соңғы мәліметтерге сүйенсек, Қазақстандағы зейнеткерлер саны артып, 2 млн 516 мың адамға жеткен.
Мемлекеттік әлеуметтік саясаттың бұл қадамы зейнеткерлердің әл-ауқатын арттырып, инфляция әсерін азайтуға бағытталған. Бұл өзгерістер еліміздегі 2,5 млн-нан астам қарияның өмір сүру сапасына оң әсерін тигізеді.
