Берлинде өткен халықаралық Grüne Woche (Жасыл апта) көрмесінің 100 жылдық мерейтойы аясында Қазақстан өзін сенімді әріптес ретінде танытты. Сауда және интеграция министрі Арман Шаққалиев бастаған делегация агроөнеркәсіптік кешен мен сауда саласындағы еліміздің экспорттық мүмкіндіктерін паш етті, – деп хабарлайды 7-su.kz ақпараттық порталы.
Көрмедегі ең басты оқиға – Қазақстанның Ұлттық павильонының салтанатты түрде ашылуы. Бұл алаң тек өнімдерді көрсетумен шектелмей, халықаралық іскерлік диалог орталығына айналды. Мұнда отандық ауыл шаруашылығы өнімдерін терең өңдеу, заманауи агротехнологияларды енгізу және су үнемдеу шешімдері кеңінен таныстырылды. Неміс және халықаралық сарапшылар қазақстандық өнімдерге жоғары қызығушылық білдірді.
Министр Арман Шаққалиев сапар барысында бірқатар маңызды кездесулер өткізді. Германияның федералдық министрі Алоис Райнермен және Дүниежүзілік сауда ұйымы (ДСҰ) Бас директорының орынбасары Жан-Мари Паугаммен жүргізілген келіссөздерде азық-түлік қауіпсіздігі мен сауда кедергілерін азайту мәселелері талқыланды.
Сонымен қатар аграрлық ынтымақтастық блогында:
-
CLAAS компаниясымен өндірісті жергіліктендіру;
-
Неміс агробизнес альянсымен инновациялық технологиялар трансфері;
-
Пәкістан өкілдерімен азық-түлік қауіпсіздігі бойынша келісімдер жасалды.
Қазақстан мен Германия арасындағы экономикалық байланыстар жаңа белеске шықты. 2025 жылдың 11 айының қорытындысы бойынша:
-
Екі ел арасындағы тауар айналымы 3.91 млрд АҚШ долларын құрады;
-
Қазақстанның Германияға экспорты 7.9 пайызға өсіп, 1.17 млрд долларға жетті.
Берлиндегі кездесулердің практикалық нәтижесі ретінде наурыз айында неміс бизнесінің қатысуымен ірі бейнеконференция өткізу жоспарланды. Ал сәуір айында Германияның ірі делегациясы Қазақстанға ресми сапармен келеді деп күтілуде. Бұл сапар аясында нақты инвестициялық және өндірістік жобалар іске қосылмақ.
