Өткен ғасырда өмір сүрген жетісулық тұлғалардың өмір жолдары Қызылорда қаласымен тікелей байланысты. ХХ ғасырдың басында ел астанасы болған Қызылордада Алаш қайраткері Мұхамеджан Тынышбайұлы, ақын Ілияс Жансүгіров сынды тұлғалар қызмет етіп тер төксе, еңбек ерлері атанған Нұрмолда Алдабергенов пен Ыбырай Жақаев арасындағы достық пен өзара қызметтік қатынастары дәлел бола алады.
Ақпан айының 23-25 күндері аралығында Мұхамеджан Тынышбайұлы атындағы облыстық тарихи-өлкетану музейіне қарасты Нұрмолда Алдабергеновтың мемориалды музейі мен Ілияс Жансүгіровтың әдеби музейі Қызылорда облысында жылжымалы көрме ұйымдастырды. Мұндағы мақсат – музейаралық ынтымақтастықты нығайтуға, тарихи тұлғалар арасындағы рухани байланысты насихаттауға бағытталған.
23 ақпан күні Қызылорда қаласындағы облыстық тарихи-өлкетану музейінде Ілияс Жансүгіровтің әдеби музейінің «Ілияс Жансүгіров және Қызылорда кезеңі» атты жылжымалы көрмесі құрылып, салтанатты ашылуы өтті. Көрме «Музей tour: экспонаттар экспедициясы» жобасы аясында өткізілді. Тағылымды шараға зиялы қауым өкілдері, мәдениет саласының мамандары, жоғары оқу орындарының оқытушылары мен студенттері, БАҚ өкілдері қатысты. Сондай-ақ, көрмеге Қорқыт Ата атындағы Қызылорда университетінің аға оқытушысы, филология ғылымдарының кандидаты Айман Айтбаева және Түркістан облыстық тарихи-өлкетану музейі қызметкерлері арнайы келді.
Көрмеге Ілияс Жансүгіровтің жеке тұтынған заттары, сирек қолжазбалары, фотосуреттері мен құнды архивтік құжаттары көпшілік назарына ұсынылды. Ақынның Қызылорда кезеңіндегі шығармашылық ізденістері мен қоғамдық қызметі көрме мазмұнында кеңінен қамтылып, сол дәуірдің әдеби-рухани тынысы айқын көрініс тапты.
Ал, 24 ақпан күні Қызылорда облысы, Шиелі ауданындағы Ыбырай Жақаев атындағы күріш өсіру тарихы музейінде Нұрмолда Алдабергеновтың мемориалды музейінің «Еңбекпен ер атанған Нұрмолда» атты жылжымалы көрменің салтанатты ашылуы өтті. Көрме екі мәрте Социалистік Еңбек Ері Нұрмолда алдабергеновтың 120 жылдығына орай құрылды. Шараға Шиелі ауданының бас мамандары, Нартай Бекежанов атындағы мемориалды өнер музейі мен Шиелі аудандық тарихи-өлкетану музейінің қызметкерлері, мәдениет саласының өкілдері, сондай-ақ, мектеп оқушылары қатысты. Екі мәрте Социалистік Еңбек Ері, «Ақ күріштің атасы» атанған Ыбырай Жақаевтың ұрпағы, Шиелі ауданының құрметті азаматы Жақаев Сейітбек Ыбырайұлы жылы лебізін білдірді. Көрмеде Нұрмолда Алдабергеновтың өмірі мен еңбек жолын айшықтайтын фотосуреттер, мұрағат құжаттары, марапаттары және жеке қолданған заттары көпшілік назарына ұсынылды.
Жетісудан барған бұл екі көрме Қызылода облысы мен Қызылорда қаласының тұрғындарына барынша кеңінен насихатталып, екі облыстың мәдени-рухани сабақтастығын нығайтатын игі шара болды.
Қалқаман Абдрахманұлы,
Мұхамеджан Тынышбайұлы атындағы
облыстық-тарихи өлкетену
музейінің редакторы
