Мен таэквондо спортымен айналысамын. Бұл спорт өмірімнің ажырамас бір бөлігіне айналды. Алғашында ата-анам осы үйірмеге өзімді қорғай білсін деген ниетпен алып келген еді. Сол кезде бұл спорттың мен үшін қаншалықты маңызды болатынын әлі түсінбеген болатынмын.
Алғашқы жаттығулар оңай болған жоқ. Әр қимылды дұрыс істеу, тәртіпке бағыну, шыдамдылық таныту – бәрі де үлкен еңбекті талап етті. Бірақ уақыт өте келе таэквондоға деген қызығушылығымның артқанын сездім. Әр жаттығу мені шыңдап, өзіме деген сенімділігімді күшейтті.
Алғашқы жарысым әлі күнге дейін есімде. Таэквондомен айналысқаныма бір жыл да толмаған еді. Соған қарамастан жарысқа қатысып, ІІІ орын алдым. Сол жүлде мен үшін ерекше қымбат болды. Мен оны алтын медальмен тең көрдім. Өйткені ол – ең алғашқы жеңісім, ең алғашқы жетістігім еді. Содан кейін алдыма үлкен мақсат қойдым. Әрдайым жеңімпаз болуды көкседім. Сондықтан жаттығуға бұрынғыдан да көп көңіл бөле бастадым. Әр жарыс мен үшін үлкен тәжірибе. Кейде жеңемін, кейде жеңілемін, бірақ ешқашан берілмеймін.
Қазір таэквондо арқылы өзімді шыңдап келемін. Бұл спорт маған тек күш пен жылдамдықты ғана емес, сабырлылықты, тәртіпті, батылдықты үйретті. Ең басты арманым – болашақта үлкен жарыстарда жеңіске жетіп, елімнің намысын қорғау, Қазақстанның Көк Туын биікке көтеріп, чемпион атану.
Аманкелді ДӘРУБАЙ,
6-сынып оқушысы
