Қазақстан өңірлерінде ауа райына байланысты бірқатар ескерту жарияланды, – деп хабарлайды 7-su.kz ақпараттық порталы.
Солтүстік Қазақстан облысында желдің жылдамдығы секундына 20 метрге дейін жетеді. Петропавл қаласында түнде және таңертең тұман түсіп, көктайғақ күтіледі. Сонымен қатар өңірде су деңгейінің көтерілуі салдарынан су тасқыны болып, жолдарды су басу қаупі бар.
Жетісу облысында күндіз шығыста және батыста солтүстік-шығыстан жел соғады. Оның екпіні 15–20 м/с дейін жетеді. Облыстың солтүстік және оңтүстік бөліктерінде жоғары өрт қаупі сақталып отыр.
Павлодар облысында қардың қарқынды еруіне байланысты еріген су ағындары қалыптасып, өзендердегі су деңгейі көтеріледі деп болжануда. Соның салдарынан автожолдарды су басып, елді мекендер мен тұрғын және шаруашылық нысандарды су алу қаупі бар.
Ақмола облысында да өзендердегі су деңгейінің көтерілуі мүмкін. Мамандар елді мекендер, автожолдар, тұрғын үйлер мен шаруашылық ғимараттарды су басу қаупі бар екенін ескертеді. Осыған байланысты тұрғындарға бағыттарын алдын ала жоспарлау ұсынылады.
Бұған дейін синоптиктер Павлодарда сәуір айының соңында ауа температурасы 30 градусқа дейін көтерілуі мүмкін екенін хабарлаған.
