Ақмола облысы Қорғалжын ауданы аумағында, Сабынды ауылы маңында орналасқан Шөптікөл бөгетінің бұзылу дерегі тіркелді. Оқиға салдарынан су жайылма алқаптар арқылы елді мекен бағытына қарай таралып, «Астана – Қорғалжын» республикалық маңызы бар автомобиль жолының 75-шақырымына дейін жеткен, – деп хабарлайды 7-su.kz ақпараттық порталы.
Дегенмен, су жолдың жүру бөлігін баспаған. Қазіргі таңда көлік қозғалысы штаттық режимде жүзеге асырылып, жол жамылғысының техникалық жай-күйі тұрақты күйде сақталған.
Ахуалды тұрақтандыру мақсатында «ҚазАвтоЖол» ұлттық компаниясының Ақмола облыстық филиалы жедел іс-шараларды қолға алды. Жұмысқа 14 бірлік арнайы техника мен 30-дан астам жол қызметкері жұмылдырылған. Қорғаныс дамбасын нығайту және су өткізу жүйелерінің өткізу қабілетін арттыру үшін инертті материалдарды жеткізу мен төсеу жұмыстары үздіксіз жүргізіліп жатыр.
Аталған учаскеде орнатылған үш саңылаулы су өткізу құбыры штаттық режимде жұмыс істеп, су ағынын кедергісіз өткізуде. Жағдай тиісті мекемелердің тұрақты бақылауында.
