Жетісу облысында Отан қорғаушылар күні қарсаңында қастерлі Тәуелсіздігіміздің 35 жылдығына арналған «Жас сарбаз барысы» турнирі ұйымдастырылды.
Жетісу облысы білім басқармасы басшысының орынбасары Қайрат Қасымов өзінің құттықтау сөзінде, турнирді өткізу орны кездейсоқ таңдалмағанын жеткізді.
– Бүгін турнир батырлар мен баһадүрлер, ақындар мен жыраулар шыққан киелі Жетісу жерінде өтуде. Бұл өңірден талай дарынды жас спортшылар қанат қағып келеді. Біз олардың әрбір жетістігіне шын жүректен қуанып, әрдайым мақтан тұтамыз, – деп толғанды.
«Жас сарбаз» республикалық балалар-жасөспірімдер әскери-патриоттық қозғалысының төрағасы Мейірбек Меңдіғалиев:
– Бүгін Текеліде «Жас сарбаз барысы» турнирі төртінші рет өтуде. Бұл біріншілікке тек жас буын қатысады. Айта кету керек, бұл жай ғана қазақ күресі бойынша турнир емес, жарыс бағдарламасында Жетісу жеріне экскурсия, мұражайға бару және қаланың көрікті жерлерін көрсету болды. Келесі жылы біз бұл турнирді халықаралық деңгейде өткізуді жоспарлап отырмыз және қазір бұл мәселені пысықтап жатырмыз, – деп сөз түйіндеді.
Жетісу төрінде өткен «Жас сарбаз» турнирі жоғары деңгейде ұйымдастырылып, жас балуандардың шеберлігі мен жігерін айқын көрсетті. Елдің әр өңірінен жиналған қатысушылар боз кілемде өзара мықтыны анықтап, көрермендерге тартысты белдесу сыйлады.
Жарыс қорытындысы бойынша «Жас сарбаз барысы» атағын Павлодар облысынан Али Төлеген иеленсе, екінші орынға Жетісу облысының жас сарбазы Муслим Саятұлы қол жеткізді. Ал, үздік үштіктен Алматыдан келген Сұлтан Тұрдәлі көрінді. Жас сарбаздар алған орындарына қарай 300, 200 және 100 мың теңге мөлшерінде ақшалай сыйақылар табысталды.
Өз кезегінде арнайы номинациялар бойынша 20 мың теңге көлеміндегі сыйақы иегерлері анықталды. «Үздік техника» номинациясын Қарағанды облысының палуаны – Алияр Түсіпов алса, «Жеңіске ұмтылыс» номинациясына Ақтөбе облысының палуаны Бақдәулет Оразалы лайық деп танылды. «Шапшаңдық шебері» аталымында Абай облысының палуаны Әділмұрат Айсұлтан үздік болды. «Көрермен ықыласы» Ақмола облысының балуаны Қасым Әбілмансұрға, «Жігерлі жас сарбаз» Түркістан облысының палуаны Дидар Құлмаханға, «Үздік әдіс» Алматы облысының жас сарбазы Әсет Айдынұлына, «Тастай төзім» номинациясы Астана қаласының палуаны Ермұрат Нұрахметовке берілді.
Турнирдің әр қатысушысына «Жас сарбаз» қозғалысының арнайы тартуы және сертификат табысталды.
