Өткен жылы қала басшылығының негізгі күші экологиялық жағдайды жақсартуға, қоғамдық кеңістікті жаңартуға және тұрғын үй қорын жөндеуге бағытталды.
Бұл жұмыстың барлығы «Таза Қазақстан» республикалық бағдарламасы аясында жүзеге асырылуда. Үшаралда былтыр 19 ауқымды сенбілік ұйымдастырылды. Мемлекеттік мекемелер мен қала тұрғындарының белсенді қатысуының арқасында көшелер мен іргелес аумақтардан 850 тоннаға жуық қоқыс шығарылды.
Шаһардың «Жасыл белдеуіне» ерекше назар аударылды. Көктемгі-күзгі абаттандыру кезінде Әуезов, Алтынсарин және Қабанбай батыр көшелеріне 1200 ағаш көшеті отырғызылды. Өсімдіктердің тіршілік етуін қамтамасыз ету үшін саябақ аумақтарындағы жасыл желектерді үнемі суару мен күту жүйесіне көңіл бөлінді. Қалалық орта жаңа нысандар жаңартылған қасбеттермен толықтырылды. Орталық алаң 139 млн. теңгеге ағымдағы жөндеуден өтті. Нысан толық жаңартылып, тұрғындарға пайдалануға берілді.
«Этноауыл» саябағы – Алтынсарин көшесінде ауданы 2 гектар жаңа саябақ салынды. Жоба құны – 76,8 млн. теңге. Жаңа көше жарығы Жамбыл көшесі мен №2 әскери қалашық аумағын қоса алғанда, бес учаскеде пайда болды. Қабанбай батыр көшесіндегі №180 және №182 үйлердің қасбеттері заманауи жөндеуден өтті. Ал биыл желілерді абаттандыру мен күрделі жөндеуге баса назар аударылып отыр.
Жеңіс көшесінің жоғарғы жағында аллеялардың және Жамбыл көшесінде шағын футболға арналған жаңа алаңның құрылысы басталады. Бұл жұмыстар кезең-кезеңімен жүзеге аспақ. Қаланың су құбыры желілері мен су жинау құрылыстарын толық қайта жаңартуға жобалық-сметалық құжаттама әзірлеу басталды. Сондай-ақ, жарықтандыру тіректерін жөндеу және тозығы жеткен кабельдерді ауыстыру жоспарланған. Қонаев көшесі бойындағы қасбеттерді жаңарту бойынша ұсыныс әзірленуде.
Айгүл БАЙБОСЫНОВА
Үшарал қаласы,
Алакөл ауданы
