Қазіргі нарық қатынасы қолынан келер өнері мен кәсібін нәсіп етіп, тіршілік түйткілін шешіп жүрген азаматтарға қолайлы болып отыр. Соның бір айқын мысалын Жаркент қаласының орталық базарында отбасымен бірге электрондық жүйелерді жөндеу шеберханасын ашып, көптен бері табысты еңбек етіп жүрген шебер қолды азамат Толқын Ахметшаевтың тіршілігінен аңғардық.
Алматыдағы әл-Фараби атындағы Қазақ мемлекеттік университетінің география факультетін жақсы бітіріп, туған жерге оралған жас маман Жаркент қаласындағы педагогикалық училищеде өз мамандығы бойынша бірнеше жыл студенттерге сабақ беріп, ұстаздық етті. Алайда бала кезінен құмартып, жанына серік еткен сүйікті ісі – теледидар, бейнемагнитофон, радио қабылдағыш секілді аппараттардың сызбаларын зерттеу, электроникадағы ғылыми жаңалықтарды іздеп жүріп оқу, сәті түскенде оларды жөндеп, қайта құрастыру болатын. Осы машығын ешқашан тастаған емес.
Әуелде еңбегі дос-жаран, көрші-қолаңның қажетіне жарап, олардың алғысына бөленді. Нарық заманына сай тұрмысымызға компьютер секілді күрделі, ақылды машиналар араласа бастағанда сол техниканы Жаркент өңірінде алғаш меңгергендердің бірі де Толқын болды. Сондықтан Қорғас кедені, аудандық ішкі істер бөлімі сияқты компьютерге алдымен қол жеткізген мекемелер жоғары жалақы ұсынып, жұмысқа шақырды. Сөйтіп, Толқын Ахметшаев мұғалімдік мамандығын уақытша қоя тұрып, еңбекақысы жоғары мекемелерде бірнеше жыл бойы компьютерлерді орнатып, іске қосатын шебер ретінде қызмет атқарды. Жаркент өңіріндегі көптеген мекеме мен кәсіпорынға ақылды машиналардың жабдықтарын алғашқылардың бірі болып әкеліп, орнатып берген де осы азамат.
Қазір қызы Айдана мен ұлы Айдос ержетіп, әкесінің шеберханасында көмекші болуға жарап қалды. Зайыбы Бәтимаға да осы жерден жұмыс табылған. Шеберлер отбасы орталық базар төрінен арнайы үй жалдап алып, Жаркент өңірі тұрғындарының тұрмыста қолданатын тоңазытқыш, теледидар, компьютер, бейне және радио аппараттарын жөндейтін сенімді орынға айналған. Шеберханада келушілердің сұранысына қарай іс қағаздарының көшірмесін жасап, фотосуреттерін шығаратын электрондық аппараттар да жұмыс істеп, қолма-қол табыс түсіруге мүмкіндік беріп отыр.
Толқынның бала кезінен құмартқан ісі нарық заманында халық қажетіне жарап, өз отбасын асырауға да қолайлы кәсіпке айналды. Қала орталығындағы шеберхананың еркін жұмыс істеуіне орталық базар әкімшілігі де қолдау көрсетіп келеді. «Шебердің қолы ортақ» деген нақыл осындайда айтылса керек.
Мырзағали Нұрсейіт
Панфилов ауданы
