Азаматына қарап ауылын танитын халықпыз ғой. Елім дегенде еңсесін тік ұстап, көштің алдында жүретін жандар болады. Туған жеріне туын тігіп, түтіні түзу шықсын деп жүрген сондай жандар біздің ауылда да бар. Тағы да он екі айды аяқтап, күнтізбеден жаңа жылдың алғашқы парағы ашылғалы тұр. Осы сәтте ауылымыздың ажарын ашып, базарын келтіріп жүрген қос азаматқа ел-жұрттың атынан алғыс айтуды жөн санадым.
Олар Жыланды ауылында туған Серік Оспанов пен Мұхтар Қиынов. Мұхтар Болатұлының анасы Раушан Бижанова апайымыз Шынжылыдағы мектептің іргесін қалаған әрі мектеп директоры болған жандардың бірі. Содан болса керек, ұстаздың ұлы қашан да алтын ұяға қол ұшын беруден шет қалған емес. Жылу жүйесінен бастап, көктем-күзде ауласын, маңайын тазартуға көмектесіп, арнайы техникаларын жіберіп, мүмкіндігі болса өзі де кірісіп кетеді. Жылдағы дәстүр бойынша мектептегі балаларды жаңажылдық тәттілермен қуантып, мерекелік көңіл күй сыйлады. Осындай игі істердің басы-қасында Серік Кеңесбекұлы да бірге жүреді.
Серік елімізге атымтай жомарттығымен танылған, ірі меценат Бауыржан Оспанов ағамыздың інісі. Алдындағы ағаның ізімен жүріп, ел-жұртына қашанда қолдау көрсетуге дайын. Ауылдың береке-бірлігіне ұйытқы болып жүрген қос азамат мектеп ішінде өтетін әрбір шараға демеушілік жасап тұрады.
Таулы аймақ болған соң кейде ауызсу мәселесі болып қалады. Сондай сәтте де қасындағы жігіттерін жіберіп, біздің алаңдаған көңілімізді орнына түсіреді. Атамыз қазақта: «Жақсының жақсылығын айт, нұры тасысын» деген сөз бар. Осы қанатты сөзде айтылғандай жаңа жыл қарсаңында Мұхтар Болатұлы мен Серік Кеңесбекұлына ауылдастар атынан алғыс айтып, ілтипатымызды білдіргіміз келеді. Отбасыларына амандық, шаңырақтарына шаттық, кәсіптеріне береке тілейміз. Елдің алғысын арқалап, сенімін ақтап, абыройларыңыз асқақтай берсін!
Ұлбике Қожабекова,
Шынжылы негізгі орта мектебінің шаруашылық меңгерушісі
Алакөл ауданы
