Салық органдары бүгін, 15 сәуірден бастап қазақстандықтардың мобильді аударымдарына қатысты мәліметтерді талдауды бастады, – деп хабарлайды 7-su.kz ақпараттық порталы.
2026 жылдың 1 қаңтарынан бері Мемлекеттік кірістер комитеті азаматтардың банк арқылы жасалған мобильді аударымдары жөніндегі деректерді жинап келген. Бірінші тоқсан аяқталған соң, жиналған ақпарат енді сараптамалық тексеруге жіберілді.
Қаржы вице-министрі Ержан Біржановтың айтуынша, банктер салық органдарына барлық аударымдарды емес, тек кәсіпкерлік қызметке қатысы болуы мүмкін операциялар бойынша мәлімет ұсынады. Яғни, күмәнді белгілерді жүйе автоматты түрде анықтап, тиісті органдарға жолдайды.
– 15 сәуірге дейін біз банктерден белгіленген критерийлерге сәйкес бірінші тоқсанның мәліметтерін аламыз, – деген еді вице-министр.
Енді салық қызметкерлері ұсынылған деректерді тексеріп, қажет болған жағдайда азаматтарға хабарлама жібереді. Мұндай жағдайда тұлғадан аударымдардың мәнін түсіндіру немесе тиісті есептілік тапсыру талап етілуі мүмкін.
Тексеру барысында көлеңкелі кәсіпкерлікке қатысты операциялар анықталуы ықтимал. Егер азамат бір ай ішінде 100 және одан да көп әртүрлі адамнан ақша қабылдаса және бұл жағдай қатарынан үш ай бойы қайталанса, мұндай операциялар бақылауға алынады. Бұдан бөлек, аударымдардың жалпы сомасы 12 ең төменгі жалақы мөлшерінен асуы тиіс. 2026 жылы бұл шамамен 1,1 млн теңгені құрайды.
Сонымен қатар, қарапайым тұрмыстық аударымдар тексеру нысанына жатпайды. Мәселен, достар арасында кофе ақысын төлеу, сыйлыққа ақша жіберу немесе мерекелік шараларға қаражат жинау кәсіпкерлік қызмет ретінде қарастырылмайды.
Қаржы министрлігінің мәліметінше, тек бір ғана күмәнді белгі жеткіліксіз. Салық органдары бірнеше критерий қатар келген жағдайда ғана тексеру жүргізеді.
