Қазақстанда халықты әлеуметтік қорғау жүйесін ауқымды жаңғырту жұмыстары қарқынды түрде жалғасып жатыр, – деп хабарлайды 7-su.kz ақпараттық порталы.
Өмірлік қиын жағдайға тап болған әрбір отбасы мемлекет қолдауын дер кезінде сезінуі қажет. Әлеуметтік көмектің әділ әрі ашық үлестірілуі – қоғамдық тұрақтылықтың негізгі діңгегі. Осы орайда, елімізде жүргізіліп жатқан реформалар аясында мемлекеттік қолдау тетіктері толықтай жаңартылып, атаулы көмек көрсетудің жаңа жүйесі қалыптасып келеді.
Реформаның басты жаңалығы – мемлекеттік ақпараттық жүйелердің мәліметтеріне негізделген мұқтаждықты бағалаудың сандық тетігін енгізу. Бұл заманауи тәсіл әлеуметтік көмекке мұқтаждықты айқындау процедураларын едәуір жеңілдетеді. Ең бастысы, шешім қабылдау кезеңінде адами фактордың ықпалын барынша азайтып, жемқорлық қауіптерінің алдын алуға жол ашады. Цифрландыру процесінің арқасында азаматтар артық анықтама жинау машақатынан арылады.
Жаңа ережелерге сәйкес, отбасының әл-ауқат деңгейін бағалау кезінде тек бір ғана жан басына шаққандағы табыс есепке алынбайды. Жүйе әлеуметтік-экономикалық факторлардың жиынтығын кешенді түрде талдайды. Атап айтқанда, отбасының нақты табысы, жылжымалы және жылжымайтын мүлкі, материалдық жағдайы, еңбекке қабілетті мүшелерінің жұмыспен қамтылуы және тұрғын үй жағдайлары толық назарға алынады. Бұл алгоритм отбасының нақты жағдайын шынайы бағалауға мүмкіндік береді.
Аталған сандық жүйе мемлекеттік бюджет қаражатын мақсатты әрі тиімді жұмсауды қамтамасыз етеді. Сондай-ақ Жетісу өңірі сияқты аймақтардағы әлеуметтік аз қамтылған отбасылардың, көпбалалы аналар мен мүмкіндігі шектеулі азаматтардың құқықтарын қорғауға септігін тигізеді. Мемлекеттік қолдаудың әділ үлестірілуі халықтың болашаққа деген сенімін нығайтып, тұрмыс сапасын арттырудың басты кепіліне айналады.
Әлеуметтік реформалар мен мемлекеттік бағдарламалардың нәтижесінде көмекке шын мұқтаж азаматтар дер кезінде қолдау алып, өмірлік қиындықтарды еңсеруге мүмкіндік алады. Өзгерістер жүйені туысқандық немесе таныстық арқылы емес, нақты деректер негізінде ашық жүргізуді көздейді.
