Білім саласы бойынша облысымыздың көші кейіндеп келеді. Кәмілеттік жасқа толмаған қыздардың жүктілігі мен жасөспірімдер арасындағы қылмыс деңгейі де алаңдатарлық. Облысымызда жыл сайын ондаған мектеп пайдалануға беріліп, оқушылардың алаңсыз білім алуына барлық жағдай жасалса да, өз нәтижесін бермей отыр. Білім саласында бұдан басқа да қордаланған мәселе көп. Облыс әкімінің орынбасары Жақсылық Омар кеңейтілген алқа мәжілісінде осы мәселелерді ұстаздар алдына қойды.
Білім, тәрбие жайын талқылаған жиын Талдықорған политехникалық колледжінде өтті. Оған облыстық білім басқармасының қызметкерлері, аудан, қала әкімдерінің орынбасарлары, білім бөлімдерінің басшылары мен колледж, мектеп директорлары қатысты. Кеңесте облыстық білім басқармасының басшысы Дәурен Жүнісов білім сапасын жақсарту, Ұлттық бірыңғай тестілеуге дайындық барысы бойынша баяндама жасады.
Баяндамадан соң облыс әкімінің орынбасары Жақсылық Омар өткен жылғы Ұлттық бірыңғай тестілеудің қорытындысы бойынша төменгі нәтиже көрсетіп отырған Ұйғыр, Жамбыл аудандары білім бөлімдерінің басшыларын тұрғызып, білім сапасының не себепті құлдырау деңгейінде екендігін сұрады. Сондай-ақ, ең нашар көрсеткіш көрсетіп отырған 5 мектептің директорын тұрғызып, олардан да мәселенің мән-жайын анықтап білуге тырысты. «Жүйелі жұмыс жасап жатырмыз, биыл көрсеткіш жақсы болады», — дегеннен аса алмаған мектеп директорларының жауабына қанағаттанбаған Жақсылық Мұқашұлы олардан орындарын босатуды талап етті.
— Он жылдап бір орында отырасыздар, жайлы орынтақтан айырылып қалмауды ғана ойлайсыздар. Сіздердің арттарыңызда мыңдаған жеткіншек тұр. Олардың болашағы қандай болады? Ол жағын ойланып жатпайсыздар. Бүгін бала өз дәрежесінде білім ала алмаса, ертең өз-өзін қалай қамтамасыз етпек? Мектеп директоры мен ұстаздар әр баланың тағдырына жауапты. Ал сіздер бұл жауапкершілікті сезіне алмай отырсыздар, – деді ол.
Бұдан соң облыстық білім басқармасы басшысының орынбасарлары Жаңыл Сүлейменова мен Гүлсара Исағұлованың баяндамаларын тыңдаған Жақсылық Мұқашұлы мектеп, колледж қабырғасындағы жасөспірімдердің арасында қылмыстық оқиғалардың да жиілеп кеткендігін сынға алды. Колледж директорларын орнынан тұрғызып, жастардың тәрбиесін жолға қоюды тапсырды.
Ең жанға ауыр тиер жайт – мектеп қабырғасында жүріп-ақ қыздардың жүкті болуы. Осы бойынша да аудан, қала әкімдерінің орынбасарлары мен білім бөлімінің басшыларынан сұрау алған облыс әкімінің орынбасары көпшілігінің мұндай дерекпен таныс емес екендігін естіп, тағы бір қынжылды.
– Демек, сіздер қанша оқушы жүктілік бойынша, қанша бала қылмыс бойынша тіркеуде тұр деп сұрау салып, ізденбейсіздер. Бұл да сіздердің жұмыстарыңызға, ұлдардың, қыздардың тағдырына салғырт қарайтындықтарыңыздың дәлелі, – деп білім саласына жауапты мамандарды сынға алды.
Кеңесте облыстық білім сапасын бақылау департаментінің директоры Салтанат Досматова да есеп беріп, мектептерді тексеру кезінде кездескен бірқатар кемшілікті алға тартты. Атап айтар болсақ, бастауыш сынып оқушыларының білім деңгейі төмен. Тексерілген 26 мектептің 19-ында қорытынды бағалау сәйкессіздігі байқалған. Демек, бағаны көтермелеп қою, «Алтын белгіге» үміткер емес оқушыларды негізсіз жетелеу жайттары орын алған.
Жиынды қорытындылаған облыс әкімінің орынбасары Жақсылық Омар айтылған кемшіліктерді ескеріп, оны түзету бойынша тапсырма берді. Бала – болашағымыз, оның алдағы тағдырына жауапкершілікпен қарау ұстаздарға артылған үлкен міндет, сондықтан білім, тәрбие мәселесіне аса мұқият қарап, ағаттық жібермеу керектігін тағы бір мәрте еске салды.
Алма ЕСЕНБАЕВА
