Қазақстанда жұмыспен қамтылған халық саны 9,4 миллион адамды құрады. Бұл туралы Үкімет отырысында Еңбек және халықты әлеуметтік қорғау министрі Асқарбек Ертаев мәлімдеді, – деп хабарлайды 7-su.kz ақпараттық порталы.
Министрдің айтуынша, бүгінде еңбек нарығын реттеу, жұмыскерлердің құқықтарын қорғау және еңбек қатынастарын заңдастыру бағытындағы жұмыстар жүйелі түрде жүргізіліп келеді. Статистикалық мәліметтерге сәйкес, жұмыспен қамтылған 9,4 миллион азаматтың 7,3 миллионы жалдамалы жұмыскерлер санатына жатады.
Еңбек қатынастарын цифрландыру мақсатында енгізілген «HR Enbek» жүйесінде қазіргі таңда 6,7 миллион еңбек шарты тіркелген. Бұл жалдамалы жұмыскерлердің шамамен 92 пайызын қамтиды. Сондай-ақ азаматтық-құқықтық сипаттағы шарттар негізінде 575 мыңға жуық адам еңбек қызметін жүзеге асырып жатыр.
Елдегі кәсіпкерлік субъектілерінің белсенділігі де артып келеді. Министрдің мәліметінше, Қазақстанда белсенді жұмыс істеп тұрған 174 мың заңды тұлға бар. Оның ішінде 1200 ірі кәсіпорын, 2900 орта кәсіпорын және 169 мың шағын кәсіпорын жұмыс істейді.
Жұмыскерлерді әлеуметтік қорғау шараларының бірі ретінде өндірістегі жазатайым оқиғалардан міндетті сақтандыру жүйесі де кеңінен қолданылуда. Қазіргі уақытта 118 мың кәсіпорын осы жүйемен қамтылған. Бұл жұмыс істеп тұрған заңды тұлғалардың 68 пайызына тең.
Еңбек қатынастарын ашық әрі тиімді ұйымдастыру мақсатында ұжымдық шарттарды цифрландыру жұмыстары жалғасуда. Бүгінде ел бойынша 19 мың ұжымдық шарт цифрландырылған, бұл көрсеткіш өткен жылмен салыстырғанда екі есеге артқан.
Мамандардың пікірінше, еңбек шарттарын цифрландыру, әлеуметтік сақтандыру жүйесін кеңейту және жұмыскерлердің құқықтарын қорғау бағытындағы шаралар еңбек нарығының ашықтығын арттырып, азаматтардың әлеуметтік қорғалу деңгейін күшейтуге мүмкіндік береді.
