Көксу ауданында ауыл шаруашылығы саласының маңызды бағыттарының бірі – суару жүйелерін жаңғырту жұмыстары жүйелі түрде жүзеге асырылуда. Аталған жұмыстардың барысы аудан басшылығының тұрақты бақылауында, – деп хабарлайды 7-su.kz ақпараттық порталы.
Аудан әкімі Дәулет Халелов ауыл шаруашылығы және жер қатынастары бөлімінің басшысы Данияр Сайлауұлымен, сондай-ақ ҚР СРИМ «Қазсушар» ШЖҚ РМК Жетісу филиалының Көксу өндірістік учаскесі өкілдерімен бірге суару желілерінде жүргізіліп жатқан құрылыс және қалпына келтіру жұмыстарының жай-күйімен танысты.
Атап өту керек, суару желілерін қайта қалпына келтіру жобасы Ислам даму банкі қаржысы есебінен жүзеге асырылуда. Жоба аясында жалпы ұзындығы 108 шақырымды құрайтын каналдар жаңғыртылып, ескірген гидротехникалық құрылымдар кезең-кезеңімен ауыстырылуда. Сонымен қатар, Г-блоктар мен темірбетон науаларды жаңарту жұмыстары жүргізіліп, су ресурстарын тиімді пайдалану мақсатында жаңа инфрақұрылым қалыптастырылуда.
Жобаның бірінші кезеңі шеңберінде Жарлыөзек ауылдық округіндегі «Р-1», «Р-3» каналдары мен Лабасы ауылдық округіндегі «Көк-тоган» каналында жөндеу жұмыстары қолға алынған. Қазіргі таңда бұл нысандарда құрылыс жұмыстары қарқынды жүргізілуде. Жалпы алғанда, құрылыс алаңдарында 16 техника мен 62 жұмысшы еңбек етуде.
Ал жобаның екінші кезеңінде ұзындығы 157,7 шақырым болатын 27 каналды қайта жаңғырту жоспарланған. Бүгінде Лабасы ауылдық округіндегі Мамбет каналы, Балпық ауылдық округіндегі Ақшатоган және Нұрабай каналдары, Жарлыөзек ауылдық округіндегі «Р-3» каналы, сондай-ақ Мұқаншы ауылдық округіндегі Бақытжан каналында құрылыс жұмыстары жүргізілуде. Бұл нысандарда 16 техника мен 73 жұмысшы жұмылдырылған.
Жалпы, жүзеге асырылып жатқан жұмыстар суару жүйесінің тиімділігін арттырып, егіс алқаптарын сумен қамтамасыз ету сапасын жақсартуға мүмкіндік береді. Бұл өз кезегінде ауданның аграрлық әлеуетін арттыруға және ауыл шаруашылығы өнімдерінің өнімділігін көбейтуге оң әсерін тигізбек.
Қазіргі уақытта суару науқанына қажетті барлық нысандарды дайындау жұмыстары жоспарға сәйкес жүргізілуде. Аудан әкімдігі тарапынан атқарылып жатқан жұмыстардың сапасы мен мерзімінде орындалуы қатаң бақылауға алынған.
