Кербұлақ ауданының орталығы Сарыөзектегі жаңа көшенің біріне Тезек төренің аты берілді. Бұл жайдарман жаңалықты күреңбелдіктердің тарихтан тағылым алып, бабаларға жасаған құрметі деп бағаладық.
Тезек төре Абылай ханның ұлдарының бірі, Ұлы жүз елін басқарған Әділден тарайтын Нұралы сұлтанның баласы. Өз кезінде Тезек төремен Ресей және Қытай елдері секілді алпауыт империялар санасып отырған. Көрші қырғыз елінің де ішкі, сыртқы оқиғаларына белсенді араласқан тұлға. Жетісу жерінде Ұлы жүздің аға сұлтаны бола отырып, ел үшін аянбай еңбек етіп, тарих сахнасында өшпестей із қалдырды. Атақты Сүйінбай, Түбек, Бақтыбай, Құлмамбет, тағы да басқа ақындарды барынша қолдаған, өзі де суырыпсалма ақын, күйші ретінде қазақ әдебиетінде айтарлықтай орын еншілеген.
Салтанатты жиында аудан әкімі Бағдат Әлиев көше атауының «Болашаққа бағдар: рухани жаңғыру» бағдарламасы аясында беріліп отырғанын айта келіп:
– Тезек төре сонау Семейден бастап, Ыстықкөлге дейінгі елді басқарған үлкен саясаткер. Сол себепті өткен жылдан бері ұлы тұлғаның атына көше атауын берсек деген ұсыныс білдірдік. Сол ұсынысымыз облыстық ономастика комиссиясының шешімімен мақұлданып, ҚР Тұңғыш Президенті күніне орай көше атауын беріп отырмыз, – деді ол.
Келесі сөз Тезек төренің ұрпағы Азамат Ақылбековке берілді. Ағамыз өлкетанушы, жазушы ретінде де танымал.
– Тезек төре туралы өте көп айтуға болады. Ол кісі туралы мәліметтер орыс ғалымдары мен зерттеушілері Семенов-Тянь-Шанский, Пантусов, Гейнстің, Перемышльский, қазақ ғалымдары Ш. Уәлиханов, Әлкей Марғұлан, С. Мұқанов және басқа тарихшылардың еңбектерінде кездеседі. Менің «Тезек төре», «Тезек төреге қатысты жыр-айтыстар антологиясы» атты екі кітабым жарық көрді. Ал ауыз әдебиеті нұсқасында ол кісі туралы деректер өте мол, – деп қорытты ойын.
Осыдан кейін аудан басшысы Бағдат Әлиев пен Кербұлақ ауданы мәслихатының хатшысы Бөкен Қабиұлы бірінші үйге «Тезек төре көшесі» деп жазылған тақтайшаны ілді. Талдықорғаннан арнайы келген Рысалды әже шашу шашып, жұрттың қуанышын еселей түсті.
Осы тұста шараға қатысқандар Тезек төре есімінің Астана, Алматы, Талдықорған, Тараз, Шымкент қалаларындағы көшелерге де берілуі керек екенін ұсыныс етті. Көпшілік те бұл ұсыныстың орындаларына сенім білдіріп тарады.
Саят Бақтыбай,
ЖМУ-дің 3-курс білімгері.
Кербұлақ ауданы.
