А23а айсбергі 2025 жылға дейін әлемдегі ең ірі мұз кесегі саналған, – деп хабарлайды 7-su.kz ақпараттық порталы.
Қазіргі уақытта Оңтүстік мұхитта дрейф жасап жүрген айсберг толықтай ыдырап, қарқынды түрде еріп жатыр. Ғалымдардың айтуынша, соңғы 40 жыл бойы бақылауда болған алып мұз кесегі өзінің «өмірлік циклін» аяқтауға жақын. Осы уақыт ішінде ол бірнеше ірі және ұсақ бөліктерге бөлініп, жалпы көлемінің шамамен 99 пайызын жоғалтқан.
А23а айсбергі 1986 жылы Фильхнер шельфтік мұздығынан бөлініп шыққан. Сол кезде оның ауданы шамамен 4170 шаршы шақырымды құраған. Ол 30 жылдан астам уақыт Уэдделл теңізінің орталық бөлігінде қайраңға тіреліп тұрған, кейін ғана Антарктида жағалауы бойымен қозғалысқа түскен. 2023 жылдың қарашасында ашық мұхитқа шықты.
2024 жылы айсберг Оңтүстік Георгия аралына жақындап, одан шамамен 80 шақырым жерде қайтадан қайраңға тірелді. Ол жерде мамыр айына дейін тоқтап, кейін қозғалысын жалғастырды. Тамыз айында одан ауданы 60-тан 300 шаршы шақырымға дейінгі үш ірі бөлік бөлініп шықты. Осы сәтте А23а әлемдегі ең ірі айсберг мәртебесінен айырылды.
Мамандардың мәліметінше, 2025 жылдың қаңтарында оның ауданы шамамен 1300 шаршы шақырым болған. Алайда қазіргі кезде ол 50 шаршы шақырымнан да азайған. Соңғы үш айда айсберг шамамен 1000 шақырымға жуық жол жүріп, Оңтүстік және Атлант мұхиттарының шекарасынан өтіп, 49° оңтүстік ендік маңында орналасқан. Қазір ол ашық суда дрейф жасап, біртіндеп толық еріп жатыр.
