Футболдан ел чемпионатының басталғанына көп болған жоқ. «Жетісу» футбол клубы 5 турда 5 ұпай алып, 16 команданың ішінде 11-орында тұр. Талдықорғандықтар 1 ойында жеңіске жетіп, 2 матчта тең түсіп, 2 кездесуде жеңілді. Қарсылас қақпасына 4 гол салып (1 автогол), өз қақпасына 7 доп жіберді. Қайрат Нұрдәулетов жаттықтыратын команда бастапқы турларды чемпионаттағы фаворит командаларға қарсы өткізгенін ескеруіміз керек.
Қайрат Нұрдәулетов қайта келгелі «Жетісудың» қорғанысы былтырғымен салыстырғанда әлдеқайда мығым, шабуылы ширақ көрінеді. Былтыр «Жетісу» 5 турдың 3 ойынында тең түсіп, 2 кездесуде жеңіліп, 3 ұпай алған (тек 1 гол салып (Шмид 1-турда «Қызылжар» қақпасына салды, есеп – 1:1), өз қақпасына 5 гол жіберген еді).
Биыл бастапқы тураларды «Астана» (1-тур, 1:4), «Тобыл» (2-тур, 2:2), «Қайрат» (3-тур, 0:0), «Каспий (4-тур, 1:0) және «Елімай» (5-тур, 0:1) командаларына қарсы өткізді. Кейінгі кездесуде семейліктермен ойнап, 0:1 есебімен (85 минутта «Жетісу» қақпасына пенальтиден Роман Мұртазаев салды) жеңілді.
– Өте өкінішті. Тең ойын еді. Бұл пікіріммен ойынды көргендер келісер. Ойын барысында шабуыл шебімізге айтарлықтай күш керек екендігі көрінді. Бірақ ойыншылар ойдағыдай ойнады. Бұл – футбол. Нәтижені қабылдауымыз керек. Жігіттердің де өзегі өкініштен өртеніп тұр. Бүгінгі жіберген азғантай қателіктермен жұмыс істейміз. Келесі ойындарда өз жанкүйерлерімізді қуантқымыз келеді, – деді ойыннан кейін Қайрат Нұрдәулетов.
«Жетісу» футбол клубы келесі ойындарын 18 сәуірде «Ертіске» (Павлодар облысы), 25 сәуір «Ұлытауға», 2 мамырда «Қайсарға» (Қызылорда облысы) қарсы өткізеді. Әзірге «Жетісу» футбол клубы өз ойындарын Талдықорғандағы Орталық алаңда қашан өткізетіні белгісіз. Ал оған дейінгі кездесулерді Алматыдағы «Хан Тәңірі» алаңында ойнайды.
Чемпионаттағы жалпы мергендер тізімін «Елімай» (Абай облысы) футбол клубының ойыншысы Роман Мұртазаев 4 голмен бастап тұр. Одан кейін 3 гол салған «Қайраттың» (Алматы) футболшылары Жоржиньо мен Дастан Сәтпаев, «Қызылжардың» ойыншылары (Солтүстік Қазақстан облысы) Йоханнес Бьорталид, Этьен Бегре тұр. «Жетісу» сапынан бес турда гол салған үшеу – Марко Живанович (1-турда), Мади Жақыпбаев (2-турда), Серікжан Мұжықов (2-турда).
Серік ҚАНТАЙ
