Мехикодағы атақты «Ацтека» аренасында өткен Мексика мен ОАР (Оңтүстік Африка Республикасы) құрамалары арасындағы әлем чемпионатының ашылу матчы футбол тарихына енді. Кездесуде бас төреші бірден үш қызыл қағаз көрсетіп, әлем чемпионаттарының ашылу ойындары үшін жаңа антирекорд орнатты, – деп хабарлайды 7-su.kz ақпараттық порталы Qazaqtoday.info сайтына сілтеме жасап.
Тартысты өткен кездесудің 49-минутында бразилиялық бас төреші Вилтон Сампайо соңғы үміт фолын тіркеп, ОАР құрамасының жартылай қорғаушысы Сфифело Ситхоулуды алаңнан қуды. Арада көп уақыт өтпей, VAR (бейнебақылау) жүйесінің көмегіне жүгінген рефери дөрекі ойын көрсеткені үшін оңтүстікафрикалық тағы бір футболшы Темба Званеге де тікелей қызыл қағаз көрсетті.
Матчтың соңы да шиеленіске толы болды. Қосымша уақыттың 90+2-минутында қарсыластың гол соғатын айқын мүмкіндігін ереже бұзу арқылы тоқтатқан Мексика құрамасының капитаны Сесар Монтес те алаңнан шеттетілді.
Әлем чемпионаттары тарихындағы рекордтар:
-
Жаңа рекорд (2026 жыл): Мексика — ОАР матчы — 3 қызыл қағаз (Сфифело Ситхоулу, Темба Зване, Сесар Монтес);
-
Бұрынғы рекорд (1990 жыл): Аргентина — Камерун матчы — 2 қызыл қағаз (Камерун құрамасының екі ойыншысы алаңнан қуылған болатын).
Осылайша, дүниежүзілік біріншіліктің ашылу матчтарында бұған дейін ешқашан бір ойында үш футболшы бірдей жазаланбаған еді.
Айта кетейік, өткен түні футболдан 23-ші әлем чемпионатының салтанатты ашылу рәсімі өтіп, төртжылдықтың басты додасы ресми түрде жалауын көтерді.
