Талдықорған қаласында 50 жастан асқан ардагерлер арасында өткен қалалық футбол чемпионаты өз мәресіне жетіп, өңір командалары арасындағы тартысты бәсекемен есте қалды. 2025 жылғы 10 қазанда басталған дода 2026 жылғы 18 сәуірде қорытындыланды, – деп хабарлайды 7-su.kz.
Жарыс жоғары деңгейде ұйымдастырылып, спорт ардагерлері бірнеше ай бойы өзара мықтыны анықтады. Чемпионат барысында әр команда тәжірибе мен шеберлікті ұштастыра отырып, тартысты ойын өрнегін көрсетті.
Нәтижесінде Көксу ауданының ардагерлер құрамасы қарсыластарынан басым түсіп, турнир жеңімпазы болып, команда мүшелері жарыс бойы тұрақты ойын көрсетіп, шешуші кездесулерде жинақылық пен ұйымшылдық танытты.
Чемпионат қорытындысы бойынша жеке марапаттар да табысталды. Көксу ауданының өкілі Махмет Бірлік «Үздік қақпашы» номинациясына ие болса, Рашид Смаилов «Үздік шабуылшы» атанды.
Ардагерлер арасындағы бұл біріншілік өңірде бұқаралық спортты дамытуға және салауатты өмір салтын насихаттауға бағытталған маңызды спорттық шаралардың бірі ретінде бағаланды.
