Футболдан Қазақстан ұлттық құрамасы келесі жылы өтетін Әлем чемпионатында ойнау мүмкіндігінен толықтай айырылды. Оған іріктеу ойындары аясында Брюссельдегі «Констан Ванденсток» алаңында 15 мыңнан астам жанкүйердің көзінше Бельгияның жауапсыз алты гол салып, үйге қайтаруы бұл сұраққа түбегейлі нүкте қойды. Ойыннан кейін журналистер сұрағына қысқа жауап қайтарған Қазақстан ұлттық құрамасының бапкері Әли Әлиев қызметінен өз еркімен кететіндігін мәлімдеді.
Әли Әлиевтің басшылығымен Қазақстан ұлттық құрамасы биыл қаңтардан бастап 7 кездесуде екі рет жеңіп, қалғандарында жеңілді. Бүгінге дейін футболшыларымыз ресми Уэльс (1:3, 0:1) пен Солтүстік Македониядан (0:1) жеңіліп, Лихтенштейнді 2:0 есебімен жеңді. Ал Бельгиядан 0:6 нәтижесімен ойсырай ұтылды. Белгілі спорт комментаторы Есей Жеңісұлы:
– «0:6 есебімен үшінші рет (Түркиядан 2005 жылы; Ресейден 2008 жылы) ұтылды. Қазақстан құрамасы 45 рет ірі есеппен ойсырай жеңілді. Ұлттық құрама 2024 жылдан бері (Черчесов пен Әлиев дәуірінде) 6 рет ірі есеппен ұтылды, 15 матчтың 10-ында қарсыластар қақпасына доп соға алмады», – деген статистикасын айтты.
Ойын аяқталғаннан кейін баспасөз мәслихатында бапкер Әли Әлиев:
– Қысқа ғана айтқым келеді: жеңілісті өз мойныма аламын, бұл – менің кінәм. Футболшылардың еш қатысы жоқ. Елге оралған соң бірден жұмыстан кету жөнінде арыз жазамын, – деді. Бұл шешімге түсінік берген Қазақстан футбол федерациясының президенті Марат Омаров:
– Спорттық бөліммен келесі бапкер кім болатынын команда оралған соң шешеміз. Экспат па, әлде жергілікті маман ба, оған қарамаймыз. Міндетті түрде бапкердің кәсіби құзыреттілігіне қараймыз. Ал Әли Әлиев өзіне жүктелген міндетті орындады. Құраманың орташа жасы 25-26-да. Дегенмен, нәтиже көңіл көншітпейді. Сондықтан команда келген соң кадрлық шешім қабылдаймыз. Себебі, келісімшарттық мәселе, белгілі бір шарт және заң тұрғыдан реттейтін жайт бар, – деді.
Доку мен Де Брюйненің дублі, Раскин мен Меньенің голы Бельгияның келесі қадамына сенімділік ұялатқаны анық. Матчтан кейін тілшілермен тілдескен «Манчестер Ситидің» шабуылшысы Джереми Доку: «Қазақстан құрамасы өте жақсы ойнады, әсіресе алғашқы жиырма минутта. Олар жақсы ойын көрсетті. Маған 19-нөмірлі ойыншы (Дастан Сәтпаев) ұнады. Оны жеке танымасам да қызықты ойыншы екенін байқадым», – деді
Құрамалар J тобында сынға түсіп жатыр. Қазірге дейін 4 ойыннан кейін Уэльс құрамасы 10 ұпаймен 1-орында тұрса, одан кейінгі орындардағы Солтүстік Македонияның 8, Бельгияның 7, Қазақстанның 3 ұпайы бар. Әзірге Лихтенштейннің қоржыны бос.
Серік ҚАНТАЙ
