Өзбекстан астанасы Ташкент қаласында бокстан жастар арасында өтіп жатқан Азия чемпионаты өз мәресіне жақындап қалды. Дүбірлі доданың жартылай финалында Қазақстан мен Өзбекстан құрамаларының өкілдері арасында тартысты жекпе-жек өтті. 46 келіге дейінгі салмақ дәрежесінде (U-17) ел намысын қорғаған Милана Иншина финал жолдамасы үшін ринг қожайынымен қолғап түйістірді.
Бұл туралы 7-su.kz ақпараттық порталы Vesti.kz сайтына сілтеме жасап хабарлайды.
Иншинаның қарсыласы өзбекстандық Рухшонабона Ахадава алғашқы минуттардан-ақ белсенділік танытып, басымдыққа ие болуға тырысты. Қос боксшының айқасы екінші раундта мерзімінен бұрын аяқталды. Төрешілердің шешімімен өзбекстандық спортшы техникалық нокаутпен жеңіске жетіп, турнирдің финалдық кезеңіне жолдама алды.
Осылайша, Милана Иншина Азия чемпионатының қола жүлдесін қанағат тұтты. Қазақстандық боксшының жартылай финалға дейін көрсеткен қажырлы еңбегі мен шеберлігі жоғары бағаланып, ол құрлықтық доданың жүлдегерлері қатарынан көрінді. Қазіргі уақытта Ташкенттегі шаршы алаңда өзге де отандастарымыз финалдық жолдамалар мен алтын медальдар үшін тартысты жекпе-жектерін жалғастыруда.
