Қысқы Олимпиада ойындары басталғалы теледидарға телміріп, әр әлеуметтік желіден спортшыларымыздың нәтижелерін қарап, өзімізше пікір айтып, жан-жақты талқылап жатырмыз. Ел спортшыларының арасынан көзге айрықша көрініп, нәтижесі сүйсінткен бір жан болса, ол – Илья Мизерных. Оның көрсеткіші Қазақстан тарихындағы шаңғымен тұңғырдан секірудегі ең үздік нәтиже.
Тау басына шығып, төмен түсер сәтінде тақым қысып «қалай болар екен?» деп елеңдеп қалғанымыз бар. Қазақстандық 19 жастағы Илья Мизерныхтың қайсарлығына, алғыр құстарша құйылып келіп түйіліп түскенінде бас шайқадық. О бастағы алаңдау бекер екен. Өзінің дебюттік Олимпиадасында Илья Мизерных 8-орыннан көрінді. Алғашқы секіргенінде 140,5 метрге секіріп 137.0 ұпай алса, екінші талпынысында 138,5 метрге секіріп, жеке техникасын есепке алғандар 147,0 ұпай берді. Жалпы 281.6 ұпай алды. Бұл Қазақстан тарихындағы тұғырдан секірудегі ең үздік көрсеткіш. Ал чемпион болған словениялық Домен Превц ( 138,5 + 141,5 – 301,8 ұпай) үздік нәтиже көрсетсе, одан кейін жүлдегер болған жапониялық Рен Никаидо (140,0 + 136,5 – 295,0 ұпай), поляк Кацпер Томасяк (133,0 + 138,5 – 291,2 ұпай) та барын салды.
Илья Мизерных жарысқа түсіп жатқанда «Qazsport» арнасында комментатор болған Есей Жеңісұлы ағамыз сыннан кейін: «Болайын деп тұрған бала екен. Осы баланы жақсы қолдау керек. Тентіретпей, ешкімге қол жайдырмай. К.Стох, Раймонд, т.б. мықтыларды жолға тастап, 8 (!) орын алды. Нән тұғырдан ешқашан мұндай нәтижеміз болған емес. Жүргізіп отырып жүрегім аузымнан шығып кете жаздады»,-дейді.
Милан Олимпиадасындағы сәтсіздігін Ильяның өзі жарыстан кейін журналистерге берген сұхбатында: «Әлем кубогында жинаған ұпайларым аздық етті. Өйткені мен жиырмасыншы нөмірмен өнер көрсеттім де, менен кейін секіргендерге қарағанда екі саты жоғары секірдім. Соның салдарынан сегіз саты төмен түстім. Қонуым да сәл әлсіз болды, әлі де жетілдіру қажет. Екінші секіруде бәрі жақсы болды, тек тұғырдан серпілу сәтінде аздап кемшілік болды. Оған қоса арттан соққан жел үшін ұпай қосылды. Бізде алысқа серпілу үшін жел үлкен рөл ақтарады. Міндетті түрде қарсы бағыттан жел соғуы шарт емес, бірақ қарсы жел болса – тіпті керемет», – деді.
Осыған дейін жасөспірімдер арасындағы қысқы Олимпиададан ел тарихында тұңғыш алтынды алған Ильяның талпынысы жылдан жылға ұлғайып, нәтижесі өсіп келе жатқандығын байқадық. Оңтүстік Кореяда 2024 жылы өткен жасөспірімдер арасындағы Олимпиадада Альпенсия тұғырынан секірген Илья 1-кезеңде 110.2 ұпай, 2-кезеңде 103.8 ұпай алып, жалпы 214.0 ұпаймен жарыстың жеңімпазы атанды.
Илья 2007 жылдың 7 ақпанында Алматы қаласында дүниеге келген. Ол 6 жасында Алматыдағы №3 балалармен жасөспірімдер спорт мектебіне қабылданып, тұғырдан секірумен шындап айналыса бастайды. Алғашқы бапкері – Шыңғыс Нәбиев. Одан кейінгі жаттықтырушылары Алексей Губченко, Сергей Баденко және Анатолий Королев болды. Ильяның дәл осы бағытты таңдап, кәсіби шұғылдануына спортпен шұғылданатын көршісі әсер еткен. Бүгінде Ильяның өзі «жарақат алып қалу қауіпі жоғары спорттың бірі ғой» дегендерге «керсінше, әдемі спорт. Тек оны сезіну керек» деп қысқа қайырады. Оның арманы Олимпиаданың алтыны. Алғашқы талпынысын көрдік. Соған орай болашағына мол сеніммен қараймыз.
Серік ҚАНТАЙ
