Бір апта бұрын ғана Астанада волейболдан әйелдер командалары арасында өткен ел чемпионатының 34-ші маусымында жеңіске жеткен «Жетісудың» құрамында Азия чемпиондар лигасының қарсаңында өзгерістер орын алды. Әсіресе, орталық тосқауыл қоюшылардың шебінде ойыншылар алмасты, – деп хабарлайды 7-su.kz ақпараттық порталы.
Осыған дейін «Алтай» сапында ел чемпионы болған, өткен маусымда «Қуаныш» сапында ойнаған 30 жастағы Полина Уфимцева «Жетісудың» қатарына келіп қосылды. Полина 26-30 сәуірде Тайланд астанасы Бангкок қаласында өтетін 2-ші Азия чемпиондар лигасына қатысады. Команданың берген ақпаратынша Полинамен келесі маусымда жетісулықтардың сапында ойнау жөніндегі ұсыныс әлі талқыланып жатыр.
Плей-офф кезеңінің алдында аяғынан жарақат алған команда капитаны, орталық тосқауыл қоюшы Кристина Аниконова сары құрлықтың үздік командалары тоғысатын турнирге қатыспайды.
Еске салайық, «Жетісу» волейбол клубының құрылығанына биыл 25 жыл толады. Осы айтулы датаға орай жетісулықтар ел чемпионатының 34-ші маусымында жеңіске жетіп, тарихта 10-шы рет Қазақстан чемпионы атанды.
