Финалистер саны бойынша Ресей құрамасы көш бастады. Ресейлік боксшылар 13 салмақ дәрежесінің 12-сінде финалға шықты. Екінші орында алты финалистпен Өзбекстан құрамасы тұр. Қазақстан құрамасы төрт боксшымен үздік үштікке енді.
Сондай-ақ Әзірбайжан, Беларусь, Қырғызстан және Тәжікстан құрамаларынан бір-бір боксшы финалға жолдама алды.
Қазақстан атынан әлем чемпионатының финалында Сәкен Бибосынов (54 кг), Оразбек Асылқұлов (57 кг), Абылайхан Жүсіпов (71 кг) және Сабыржан Акқалықов (75 кг) өнер көрсетеді.
Айта кетейік, Қазақстан құрамасы жарысты бастапқыда Ресей және Өзбекстанмен қатар 13 боксшымен бастаған. 1/8 финалда Ерасыл Жәкпеков (81 кг), Дәулет Төлемісов (86 кг) және Нурмагамед Юсупов (92 кг) жарыстан шығып қалды. 1/4 финалда Даниял Сабит (51 кг), Серік Теміржанов (60 кг), Санатәлі Төлтаев (67 кг) және Нұрлан Сапарбай (+92 кг) жеңіліс тапты. Ал Теміртас Жүсіпов (48 кг) пен Ертуған Зейнуллинов (63,5 кг) жартылай финалға дейін жетіп, қола жүлдеге ие болды.
Қазақстан қатысатын финалдық жұптар төмендегідей:
54 кг – Сәкен Бибосынов пен Вячеслав Рогозин (Ресей),
57 кг – Оразбек Асылқұлов пен Хусравхон Рахимов (Тәжікстан),
71 кг – Абылайхан Жүсіпов пен Сергей Колденков (Ресей),
75 кг – Сабыржан Акқалықов пен Исмаил Мутсолгов (Ресей).
IBA әлем чемпионатының финалдық жекпе-жектері 13 желтоқсанда өтеді. Турнир жеңімпаздарына 300 000 доллар, күміс жүлдегерлерге 150 000 доллар, қола жүлдегерлерге 75 000 доллар табысталады. Ал ширек финалда тоқтаған боксшылар 10 000 доллар көлемінде сыйақы алады.
Дереккөз: Vesti.kz.
