IBA ұйымдастырып жатқан бокстан әлем чемпионатында Өзбекстан құрамасында сынға түскен қазақ боксшысы Саят Ілясов 1/16 финалда жеңіліп, жарыс жолынан шықты, – деп хабарлайды 7-su.kz ақпарттық порталы Vesti.kz сайтына сілтеме жасап.
2025 жылы Дубайда өтетін әлем біріншілігінің екінші жекпе-жегінде 63,5 кг салмақ дәрежесінде өнер көрсеткен Саят Ілясов Қырғызстан боксшысы Омар Ливазамен қолғап түйістірді. Кездесу қорытындысы бойынша төрешілер бірауыздан 5:0 есебімен жеңісті Ливазаға берді. Бұл нәтиже Өзбекстан құрамасының турнирдегі алғашқы сәтсіздігі болды. Омар Ливаза жарысты жалғастырып, келесі кезеңге өтті.
Қазақстан құрамасы да бүгін өз жекпе-жектерін өткізуде. 7 желтоқсанда Оразбек Асылқұлов әлем чемпионатындағы алғашқы айқасына шықты. Кешкі бағдарламада тағы екі отандасымыз – Ертуған Зейнуллинов және Абылайхан Жүсіпов рингке көтеріледі.
IBA әлем чемпионаты 4-13 желтоқсан күндері өтеді. Турнирдің жүлде қоры ауқымды: чемпиондар 300 000 доллар алады, күміс жүлдегерлерге 150 000 доллар, қола медаль иелеріне 75 000 доллардан беріледі. Ал ширекфиналда жарыстан шығатын спортшылар 10 000 доллар көлемінде сыйақыға ие болады.
