Талдықорған қаласында әртүрлі конфессия өкілдері арасында «Салауатты рух» атты шағын футбол турнирі өтті.
Іс шара Жетісу облысы Дін істері басқармасының мемлекеттік әлеуметтік тапсырысы аясында жүзеге асырылып жатқан «Діни бірлестіктер басшылары клубының қызметі» жобасы шеңберінде ұйымдастырылды.
Турнирдің мақсаты – рухани-адамгершілік құндылықтарды нығайту, конфессияаралық келісімді дамыту, салауатты өмір салтын насихаттау және түрлі діни бірлестіктер өкілдері арасындағы достық пен өзара түсіністікті арттыру.
Жарысқа барлығы 30 адам қатысып, бақ сынасты. Турнир достық, өзара құрмет және әділ бәсеке жағдайында өтті. Қатысушылар жоғары спорттық дайындықтарын, ұйымшылдықтарын және командалық рухтарын көрсетті.
Турнир қорытындысы бойынша:
І орынды «Қайсар» командасы иеленіп, 150 000 теңге көлеміндегі сертификатпен марапатталды;
ІІ орынды «Қыран» командасы алып, 100 000 теңгелік сертификатқа ие болды;
ІІІ орын «Барыс» командасына бұйырып, 50 000 теңгелік сертификат табысталды.
Сондай-ақ арнайы номинациялар бойынша жеңімпаздар анықталды. «Үздік қақпашы» аталымын Жұмағалиев Манат, ал «Үздік ойыншы» аталымын Қазиз Темірлан иеленді. Номинация жеңімпаздарына 20 000 теңге көлемінде ақшалай сыйлықтар табысталды.
Жеңімпаздар мен жүлдегерлерге дипломдар, кубоктар және медальдар тапсырылды. Марапаттау рәсімін Жетісу облысы Дін істері басқармасы басшысының міндетін атқарушы Молдабаева Динара Мұратқызы өткізіп, қатысушыларды құттықтап, конфессияаралық татулық пен қоғамдық келісімді нығайту жолындағы жұмыстарына табыс тіледі.
Турнир барысында қатысушыларға жеңіл дастарқан мен сергітетін сусындар ұсынылды.
«Салауатты рух» турнирі спорттың адамдарды біріктіретін маңызды құрал екенін тағы бір мәрте дәлелдеп, түрлі конфессия өкілдерінің достығы мен ынтымақтастығын нығайтуға өз үлесін қосты.
