Жетісу облысының әкімі Бейбіт Исабаев қаңтардың басында Өскеменде өткен волейболдан әйелдер арасында Қазақстан Суперкубогында жеңіске жеткен «Жетісу» командасын арнайы құттықтады. Өз кезегінде облыс басшысы ойыншыларға сәттілік тілеп, чемпионатты жеңіспен аяқтауға ниеттес екенін білдірді, – деп хабарлайды 7-su.kz ақпараттық порталы.
«Жетісу» ел Суперкубогы үшін болған ойында Қазақстан кубогында жеңіске жеткен «Тұран» (Түркістан облысы) командасын 3:0 (25:22, 25:22, 25:17) есебімен жеңді. Осылайша өз тарихында Суперкубокты бесінші рет (2015, 2018, 2019, 2024, 2026) алды.
Талдықорғанда орналасқан еліміздегі әзірге жалғыз волейбол базасына арнайы келіп құттықтаған облыс әкімі Суперкубоктағы жеңістері үшін әр ойыншыға алғыс айтып, тілеулестігін білдірді.
– Осындай қолдау көрсетіп, жанашырлық танытып жатқан облыс басшылығына алғыс айтамыз. Енді бізді чемпионаттағы ойындар күтіп тұр. Әр кездесу біз үшін маңызды. Турнирлік кестені бірінші орынмен аяқтап, плей-оффта жақсы нәтиже көрсеткіміз келеді, – дейді «Жетісу» волейбол клубының капитаны Кристина Аниконова.
«Жетісу» командасы енді Өскеменде өтетін ІІІ үлкен тур ойындарына барады. Ол аяқталысымен турнирлік кестедегі орынды түзетін шешуші төртінші тур, одан кейін чемпионадықты анықтайтын плей-офф кезеңі болады.
