«Қайрат» футбол клубының қақпашысы Темірлан Анарбеков алдағы мақсаттары, армандары және жаңа маусымға деген дайындығы туралы айтты.
Чемпиондар лигасының соңғы 6-турында «Олимпиакосқа» қарсы ойында үздік ойыншы атанып, қазақстандық футбол тарихында жаңа жетістікке қол жеткізген Темірлан бұл марапатты жеке еңбегіне емес, бүкіл команданың жұмысына бағалайды.
«Бұл – команданың еңбегі. Біз бар күшімізді салып, жеңісті елге әкелгіміз келеді. Бірнеше рет Пафоспен жолығып жүрміз, бұйырмай жатыр. Бірақ алдағы уақытта жеңеміз деп сенемін. Қазақстанға Чемпиондар лигасының жеңісін алып келу – басты мақсат», – деді қақпашы.
Темірланның айтуынша, ол бала күнінен Англия Премьер-лигасында ойнауды армандайды. Еуропада доп тебу – әр қазақ футболшысының арманы екенін де жасырмады.
«Еуропаның кез келген клубында ойнағым келеді. Маған бәрібір. Бірақ бала кезімнен Англия Премьер-лигасында өнер көрсетуді армандадым. Әлемнің үздік қақпашыларымен тайталасу – үлкен арманым», – деді ол.
Сонымен бірге, қақпашы қазіргі таңда шетелдік клубтардан нақты ұсыныс түспегенін айтты. Бұл мәселемен клуб басшылығы айналысып жатқанын жеткізді.
«Маған әлі ресми ұсыныс келген жоқ. Директорлар сөйлесіп жатқан шығар, нақтысын білмеймін. Егер ұсыныс болса, айтады. Қазір тек жақсы ойнап, маусым соңында жаңа жобалармен Қазақстан футболының дамуына үлес қосқым келеді», – деді Анарбеков.
Айта кетейік, Темірлан Анарбеков «Қайраттың» Чемпиондар лигасына жолдама алуына айтарлықтай үлес қосқан негізгі қақпашы. Оның «Олимпиакоспен» матчтағы керемет ойыны арқылы ол Чемпиондар лигасында «үздік ойыншы» атанған тұңғыш қазақстандық футболшы болып тарихқа енді.
Дереккөз: Stan.kz
