Қазақстанның еңбек сіңірген жаттықтырушысы, Олимпиада жүлдегері Назым Қызайбайдың бұрынғы бапкері Жұмабек Өмірзақов Жәнібек Әлімханұлына байланысты допинг дауына пікір білдірді. Бұл туралы Sport Arena хабарлады.
Өмірзақовтың айтуынша, осы оқиғадан кейін Әлімханұлының жоғары деңгейдегі жекпе-жектерге жолы жабылуы мүмкін.
Оның сөзінше, Әлімханұлы алдағы қарсыласы Эрисланди Ларамен толық 12 раундтық айқасқа физикалық тұрғыда шыдас бере алмайтынын түсінген.
«Мұны оның өзі ойлап тапты деп айтпаймын. Команда ішінен біреу кеңес берген болуы мүмкін. Ол Ларамен толық 12 раунд жұдырықтасатынын білді. Ал ондай қарқынға кардио жетпейтінін өзі де түсінді. Эрисланди кубалық мектептің өкілі. 42 жасында да жылдамдығы мен ең бастысы тәжірибесі бар. Сол себепті ол мельдонийге жүгінген. Енді онымен рингке шығуға ешкім құлық танытпайды. Осы қадамы өзіне үкім болды деп ойлаймын», – деді маман.
7 желтоқсанда үш чемпиондық белдік сарапқа салынатын жекпе-жек алдында қазақстандық боксшы допинг дауының ортасында қалған еді.
Әлемдік бокс ұйымы (WBO) Әлімханұлының допинг-тесті оң нәтиже бергенін ресми растады. Тергеу басталды.
Спортшы өзі ереже бұзбағанын мәлімдеп, үлгінің екінші бөлігін қайта тексеруді сұрады.
Кейін боксшы командасы жағдайға байланысты жеке мәлімдеме жасады. Ұйымдастырушылар титулды айқаста Әлімханұлының орнына шығатын спортшыны да атады.
