Вьетнамның Дананг қаласында өтіп жатқан күрес түрлерінен жастар арасындағы Азия чемпионатында қазақстандық балуандар сәтті өнер көрсетуді жалғастырып жатыр. Кезекті жарыс күнінде грек-рим және әйелдер күресінің өкілдері бозкілемге шығып, ел қоржынына тағы алты медаль салды, – деп хабарлайды 7-su.kz ақпараттық порталы.
Әйелдер күресінде 55 келіге дейінгі салмақ дәрежесінде сынға түскен Шұғыла Өмірбек қарсыластарынан басым түсіп, Азия чемпионы атанды. Отандасымыз финалда жоғары шеберлік көрсетіп, алтын медальді иеленді.
Сондай-ақ, Қазақстан құрамасының өкілдері тағы екі күміс жүлдеге қол жеткізді. Алина Ертөстік 76 келіге дейінгі салмақта күміс медаль жеңіп алса, грек-рим күресінен 87 келіге дейінгі салмақта белдескен Ерасыл Жеңгіс те чемпионаттың күміс жүлдегері атанды.
Қола медаль иегерлері қатарында Лаура Ғаниқызы (50 келіге дейін), Виктория Хусаинова (59 келіге дейін) және Диас Нұрақов (63 келіге дейін) бар.
Айта кетейік, бұған дейін өткен жарыс күндерінде де қазақстандық спортшылар жоғары нәтиже көрсеткен болатын. Грек-рим күресінен Айбек Айтбеков (60 келіге дейін) пен Ислам Евлоев (97 келіге дейін) чемпион атанып, ел қоржынына алтын медаль салды.
Сонымен қатар, Ибрахим Нұрмұхаммед (72 келіге дейін), Әлихан Дурсунов (77 келіге дейін) және Джохар Узаров (130 келіге дейін) күміс жүлдеге ие болды. Ал Кирилл Минько 82 келіге дейінгі салмақта қола медаль жеңіп алды.
Азия чемпионаты әлі де жалғасуда. Қазақстандық жанкүйерлер ұлттық құрама балуандарынан жаңа жеңістер күтеді.
