Үшарал қаласында өткен 2012 жылы туған кіші жасөспірімдер арасындағы облыстық чемпионатта «Жекпе-жек» бокс мектебінің шәкірттері, егіздер Ерзат пен Нұрзат өз салмақ дәрежелерінде (40–43 кг) топ жарып, облыс чемпиондары атанды.
Бір үйдің қос батырын спортсүйер қауым жақсы таниды. Бұған дейін олар алғаш рет жарысқа қатысқан кезде бір салмақта бас жүлде үшін кездесіп, сол сәтте кішісі ағасына жол берген еді. Бұл жайт олардың бауырмалдық пен ізгіліктің шынайы үлгісін көрсеткен болатын.
Бүгінде егіздердің екеуі де табандылығы мен еңбекқорлығының арқасында жеңіс тұғырынан көрінді. Төрт ұлдың ортаншылары саналатын Балтабай Ерзат пен Нұрзат – бала кезден спортқа ынтық, тәртіп пен төзімділікті өмір салтына айналдырған жас спортшылар. Олардың басты арманы – ел намысын әлемдік аренада қорғап, көк байрақты көкте желбірету.
Бапкері Рахат Оразалинов пен әкесі Мұрат Казбеков жас чемпиондардың болашағынан үлкен үміт күтеді.
Мұхтар Күмісбек
