Волейболдан «Жетісу» қыздар командасы Бразилияның Сан-Паулу қаласында өтетін клубтар арасындағы әлем чемпионатының алдында команда сапына жаңа ойыншы қосты. Ол Қытай құрамасында ойнаған, Түркияның, Италияның чемпионаттарында өнер көрсеткен – Мяо Йвэнь. «Жетісу» 25 жастағы волейболшымен маусымның соңына дейін келісімшартқа қол қойды.
Ел чемпионы, Азияның үздігі «Жетісу» әлемнің таңдаулы 8 командасы ойнайтын клубтар арасындағы Әлем чемпионатында 8-14 желтоқсанда Бразилияда сынға түседі. Бұл команда үшін үлкен тәжірибе болмақ. Ал жаһан жарысының қарсаңында командада ауыс-түйіс орын алып жатыр. Былтырғы маусымда ел чемпионатының және Азия Чемпиондар лигасының үздік ойыншысы болған команда капитаны Карина Денисова жарақатынан кейінгі қалыпқа келу процесі ұзаққа созылуына байланысты клубпен арадағы келісімшарт үзілді. Бірақ, команда басшыларының шешімімен Талдықорғандағы базада қалып, жеке жаттығу жұмыстарын жүргізеді. Ал оның орнына ќытайдың «Sichuan Wuliangchun» (2018/2022; 2024/2025), италияның «Monviso volley» (2022/2023), түркияның «PTT Spor» (2023/2024) клубтарында ойнаған 25 жастағы қытай қызы Мяо Йвэнь қосылды.
– Жаңа ойыншыға артылар үміт зор. Команда әуелі клубтар арасындағы әлем чемпионатына қатысады, одан кейін араға бір апта салып Өскемендегі Қазақстан кубогында ойнайды. Бұл үлкен сын болғалы тұр. Қатарымызға қосылатын ойыншыны жан-жақты зерттедік, ойыншы біз күткен үдеден шығады деп ойлаймын, – дейді «Жетісу» волейбол клубының директоры Нияз Жантілеуов.
Қали АСҚАР
