Көксу ауданында жас спортшыларға құрмет көрсетіліп, олардың жетістіктері жоғары деңгейде бағаланды. Аудан әкімі Дәулет Халелов пара үстел теннисінен жастар арасындағы Қазақстан Республикасының чемпионатында жүлделі орындарға ие болған дарынды спортшыларды арнайы қабылдады, – деп хабарлайды 7-su.kz ақпараттық порталы.
Аталған чемпионат Павлодар қаласында өтіп, еліміздің түкпір-түкпірінен келген жас спортшылардың басын қосты. Байрақты бәсекеде Көксу ауданының намысын қорғаған өрендер жоғары дайындық пен табандылықтың үлгісін көрсетіп, жүлделі орындардан көрінді.
Атап айтқанда, жекелей сында Дәулет Ақат қарсыластарынан оқ бойы озып, чемпион атанды. Ал Айдосұлы Арман мен Жарқын Ағарсын тартысты додада үздік үштікті түйіндеп, қола жүлдеге ие болды. Бұл – аудан спортының дамып келе жатқанының айқын дәлелі.
Қабылдау барысында аудан әкімі жас чемпиондарды құттықтап, олардың жетістіктері табандылық пен тынымсыз еңбектің жемісі екенін атап өтті. Сондай-ақ, спортшыларға алғыс хаттар мен сый-сияпаттар табысталып, алдағы жарыстарда да биік белестерді бағындыруларына сенім білдірілді.
Өз кезегінде, «Amanat» партиясының аудандық филиалының төрағасы Мәлік Аманбайұлы да сөз алып, жастарға ақ батасын беріп, ел намысын абыроймен қорғап жүрген спортшыларға сәттілік тіледі.
