Талдықорған қаласындағы Әскери-техникалық мектеп филиалында студенттер мен мектеп оқушыларына арналған Ашық есік күні жоғары деңгейде ұйымдастырылды. Іс-шараның басты мақсаты – жастарға әскери білім беру жүйесін таныстыру, оқу процесінің ерекшеліктерін көрсету және болашақ Отан қорғаушылардың даярлық деңгейімен таныстыру болды.
Шара барысында қатысушылар оқу орнының материалдық-техникалық базасымен, заманауи қару-жарақ үлгілерімен және әскери техникалармен танысты. Сонымен қатар, қонақтарға казарма жағдайы, оқу сыныптары, тәрбиеленушілердің күнделікті тұрмысы мен оқу тәртібі кеңінен көрсетілді. Ерекше қызығушылық тудырған нысандардың бірі – «Жауынгерлік даңқ» мұражайы болды.
Іс-шара аясында мектеп басшылығы сөз сөйлеп, әскери-техникалық мектептің негізгі міндеттері, оқу-тәрбие процесі және әскери-патриоттық тәрбиенің маңыздылығы туралы жан-жақты ақпарат берді. Өз сөздерінде олар қазіргі таңда жастарды Отан қорғауға дайындау, олардың бойында жауапкершілік пен тәртіпті қалыптастыру маңызды бағыттардың бірі екенін атап өтті.
– Мұндай іс-шаралар жастарға әскери саланың ерекшеліктерін жақыннан танып-білуге мүмкіндік береді. Біздің басты міндетіміз – болашақ сарбаздардың бойында патриоттық рухты қалыптастыру, әскери қызметке деген құрметті арттыру және олардың саналы таңдау жасауына бағыт-бағдар беру, – дейді әскери-техникалық мектеп директорының орынбасары подполковник Андрей Ворков.
Ашық есік күні қатысушыларға әскери өмірдің қыр-сырын тереңірек түсінуге, оқу орнының тыныс-тіршілігімен жақынырақ танысуға мүмкіндік берді. Мұндай форматтағы кездесулер жастардың әскери қызметке деген қызығушылығын арттырып қана қоймай, олардың болашақ мамандық таңдауына оң ықпал етеді.
Жетісу гарнизонының баспасөз қызметі
