Еліміздің денсаулық сақтау саласын дамыту және отандық медицина мамандарын қолдау бағытында маңызды шешімдер қабылданып жатыр, – деп хабарлайды 7-su.kz ақпараттық порталы BAQ.KZ сайтына сілтеме жасап.
Елімізде алғашқы медициналық-санитариялық көмек көрсететін мамандардың, бейінді дәрігерлердің, әлеуметтік қызметкерлер мен патронаж мейіргерлерінің жалақысына қосымша үстемеақы қосылады. Денсаулық сақтау министрі Ақмарал Әлназарова Үкіметте өткен баспасөз мәслихатында жалақының қалай көтерілетінін жан-жақты түсіндірді. Ведомство басшысының айтуынша, төлем мөлшері әрбір маманның үздіксіз еңбек өтіліне тікелей байланысты белгіленбек. Алғашқы көмек көрсететін мамандарға үстемеақы қосу шешімі сала бойынша кадр тұрақсыздығына негізделген, себебі емханалардағы қызметкерлердің бір жыл ішіндегі ауысым көрсеткіші 50 пайызға дейін жетеді. Сонымен қатар қосымша қаржы бөлуге дәрігерлердің жоғары жұмыс жүктемесі мен психоэмоциялық салмақ себеп болған.
Кездесу барысында Денсаулық сақтау министрі Ақмарал Әлназарова:
«Үздіксіз еңбек өтілі үшін берілетін үстемеақыны арттыру жөнінде тапсырма берілді. Аталған бастама арқылы біз бірден бірнеше маңызды мәселені шешеміз: кадр тапшылығын азайтып, халыққа көрсетілетін медициналық көмектің сапасын толық қамтамасыз етеміз», – деді.
Сондай-ақ министр жаңа үстемеақылардың үздіксіз еңбек өтіліне қарай әлеуметтік қызметкерлер мен патронаж мейіргерлеріне де берілетінін жеткізді, өйткені бұған дейін осындай мамандарға қосымша төлем мүлде қарастырылмаған еді. Ал бейінді маманның үстемеақысы еңбек өтілі мен жұмыс істейтін аймағына, яғни қалада немесе ауылда орналасуына қарай айқындалады.
Алдағы жылдың 1 қаңтарынан бастап елімізде алғашқы медициналық-санитариялық көмек көрсететін учаскелік қызметтің 77 мың қызметкеріне қосымша төлем енгізілу көзделген. Үстемеақы көлемі еңбек өтіліне байланысты лауазымдық жалақының 20-50 пайызына дейін жетеді. Мәселен, 2 жылдан астам үздіксіз еңбек өтілі бар мамандарға жалақының 20 пайызы, 3 жылдан астам тәжірибесі барларға 30 пайызы, ал 5 жылдан астам еңбек өтілі бар азаматтарға 50 пайызы қосылады. Жаңа төлемдер енгізілгеннен кейін ауылдық жерлердегі тәжірибелі жалпы практика дәрігерлерінің жалақысы үстемеақыны қоса есептегенде 760 мың теңгеге дейін, ал қалада 607 мың теңгеге дейін жетеді. Сонымен қатар еңбек өтілі аз жас мамандардың да табысы артып, ауылдағы дәрігерлердің жалақысы 386-450 мың теңге аралығында, ал орта медицина қызметкерлерінің жалақысы 221-256 мың теңге аралығында өседі.
