Күз мезгілінің келуімен ауа райы салқындап, вирустық инфекциялардың таралу қаупі артады. ҚР Денсаулық сақтау министрлігі тұрғындарды маусымдық сырқаттанудың алдын алу үшін қарапайым профилактикалық шараларды ұстануға шақырады, – деп хабарлайды 7-su.kz ақпараттық порталы.
Күз кезеңінде балалар мектеп пен балабақша ұжымдарына оралып, ересектер жабық үй-жайларда көбірек уақыт өткізеді. Бұл жағдай тыныс жолдары арқылы жуғатын аурулардың тез таралуына қолайлы орта қалыптастырады. Мамандар инфекциядан қорғанудың ең тиімді әрі сенімді жолы екпе алу екенін алға тартады. Вакцинацияны сырқаттанудың шарықтау шегіне дейін, яғни қыркүйек–қазан айларында жасатқан жөн. Өйткені ағзада вирусқа қарсы иммундық жауап пен қорғаныс тосқауылы қалыптасуы үшін кемінде 2-3 апта уақыт қажет. Екпе вирустың ауыр асқынуларының алдын алып, денсаулықты сақтауға септігін тигізеді.
Инфекциядан сақтануда жеке бас гигиенасы басты рөл атқарады. Қоғамдық орындардан, көліктен немесе даладан келген соң қолды сабынмен мұқият жуу әдетке айналуы тиіс. Сондай-ақ тұратын және жұмыс істейтін бөлмелерді жиі желдетіп, қолданыстағы заттар мен беттерді дезинфекциялау қажет. Ағзаның иммундық жүйесін нығайту үшін сапалы ұйқының маңызы зор. Ересектерге тәулігіне 7-8 сағат тынығу ұсынылады. Бұдан бөлек, күнделікті таза ауада 30 минут серуендеу және жеңіл дене жаттығулары ағзаның дертке қарсы қабілетін арттырады.
Тамақтану рационына да ерекше көңіл бөлген абзал. Күнделікті ас мәзірінде жаңа піскен көкөністер, жемістер, ет, балық, жұмыртқа мен бұршақ тұқымдас өнімдер болуы керек. Ал қант, майлы және қуырылған тағамдарды тұтынуды шектеген дұрыс. Өз бетінше емделу мен түрлі биологиялық белсенді қоспаларды (ББҚ) бейберекет қабылдаудан сақ болған өте маңызды. ББҚ медициналық препарат болып саналмайды және ол екпені де, дұрыс тамақтануды да алмастыра алмайды. Кез келген дәруменді қолданбас бұрын дәрігермен кеңескен абзал. Сырқаттанған жағдайда өзгелермен қарым-қатынасты шектеп, бірден медицина мамандарының көмегіне жүгінген жөн.
Маусымдық вирустардан қорғану әр азаматтың өз денсаулығына деген жауапкершілігінен басталады. Тұмау мен ЖРВИ-ден сақтану ережелерін орындау арқылы отбасымыз бен жақындарымызды қауіптен аман сақтай аламыз.
